AA Ralkap Hremnak Ruang Ah Paletwa Peng Kuchawngphia Khuami 60 Renglo An Zaam

Salai Cung Cung| 2018 May 22| Chin ramkulh thlanglei Paletwa peng Kuchaungphia khua cu AA ralkap (Arakan Army) nih an luh hnawh hna i mizapi an hrem hna caah khuami 60 renglo cu khua kiangkap Zinbawngpin khua lei ah May 18 ahkhan an zaam tiah kan theih.

AA ralkap cu May 16 ah Kuchaungphia khua an phan i khuami an tlaih, an hrem hna, inn chung thilril zong hramhram in an chuh an hrawhpiak hna caah khuami cu khua chungah an um ngam ti lo i Zinbawngpin khua ah an zaam tiah min langhter a duh lomi a zaam vemi pakhat nih a chim.

“AA pawl khuachung ah an rak lut i upa le nu hna cu an tlaih i an hrem hna. Innchung thilri siseh, dawr ah chiahmi thilri siseh, phone le tangka pawl zong hramhram in an chuh hna. Cu ruang ah khua ah kan um ngam ti lo i atubantuk in kan zaamnak hi a si” tiah Khonumthung sin ah a chim.

Atu hi a zaammi khuami hna cu Zinbawngpin khua sianginn ah hmunhma pek in an um i a herhmi pawl a si khawh chung in kan bawmhchanh hna tiah Zinbawngpin khuami pakhat nih a chim.

Paletwa peng ah AA ralkap le acozah ralkap kar buainak le i kahnak ruang ah a hlan zong ah khuami a thong renglo India ram lei ah an zaam bal cang. Cu lio ah a rak zaammi Paletwa peng, Kungpin khuami 300 renglo cu nihin tiang an khua ah kir ngam ti lo in an zaam rih ko tiah theih a si.
Ref: Khonumthung News

Na ruahning rak langhter ve.. (Leave a comment)

%d bloggers like this: