Hakha Education College Kai Mi Hna Eidin An Har; Cachimtu Nih Aa Chang In Eidin An Cawm Hna

Salai Ngun San Aung| 2018 January 14| Chin ramkulh khuahlipi Hakha ah hun thar mi fimcawnnak college (Hakha Education College) Siangngakchia hna cu Cozah nih bawmhmi nikhat minung pakhat 500 MMK lawng in eidin rinh an si caah an har tuk i cachimtu hna nih zingzan i chang in mehhang an daidoh hna tiah kan theih.

Chin ramkulh Fimcawnnak Minister Pu Pau Lun Min Thang le Hakha peng Amyotha Hlutaw Palai Pu Ngun Hei nih 2018 January 9 ah Hakha College, Hakha Education College le GTI an leng hna. Hi tan ah tu bantuk in siangngakchia eidin an harnak cu sianguk chang sayama nu pakhat nih upa he tonnak ah a chim.

“Cozah nih hin minung pakhat hi nikhat 1000 MMK an bawmh hna. Cu chung cun nikhat ah anmah herh hman awk ah 500 MMK cu nan pek hna lai i 500 hi an rawl man ah a si lai an ti. Minung pakhat nih zing le zan ca i 500 lawng cu zeitin hmanh in a si kho lo. Facang tal Cozah nih pe hna sehlaw aa zia deuh. Pa lawng te minung 50 an si i kalape pawng 2 le tan hi voikhat ah chuan a si. Zaangfak ngai an si. A tangmi 500 kha le Cozah nih anmah siangngakchia nan pek hna lai ti a si tikah eiman ah tuak awk a tha fawn lo” tiah a chim.

Hi kongah Fimcawnnak Minister pa nih, “500 MMK anmah pek ding timi hi ei man ah i zuk ko sehlaw anmah pumpak herhhai cu inn lei nih kua ko hna sehlaw zeitindah cozah chimh chawnh awk an tha hnga dik maw? Cun ka si khawh chung in kaa zuam lai i eidin ca a herh mi le a dang thilri a chambau rih mi pawl ca zong bawmhnak hal khawh kaa zuam ko lai” tiah a leh hna.

Sayama nu nih cun, “mi cheu cu khua te lei deuh in a ra mi zong an um. A har tak tak mi zong an um hna. Kan zaang an fak. Kanmah cachimtu pawl nih zing zan in kan i lawk i mehhang te kan damh piak hna. Cun niruk ni tibantuk ah mehhang cawk le khuachung kal duh tikah tlunkalnak kan har tuk. Motor rak kan pe kho ulaw kan sia a rem tuk hnga. Kan umnak hi khua leng ah a si tikah ho hmanh nih mehhang tibantuk zong an kan zuarh lo” tiah a biapeh ah a chim.

Hi kongah Pyidawtha upa pakhat nih, “a hmasa bik a kaimi an si fawn i anmah pawl mi ah i chuah khawh hi a biapi tak tak. Khual in a rak kai mi kan fa le te te hi bantuk in an har tuk mi cu Hakha khuanu khuapa, sang upa le biaknak siseh a dang riantuannak te te zong nih voikhat hnih chuang mehhang ti bantuk te te ruah piak kho hna usilaw a tha tuk hnga i aa dawh tuk mi thil a si fawn” tiah TCP ah achim.

Hakha Education College hi tukum lawng in siangngakchia pa minung 50 an kai thawk i tu hi sianginn hunnak zong an tuah rih lo. January thla chung asilole February thla chung ah sianginn hunnak tuah ding timhtuahnak an ngei tiah kan theih.+++

Leave a Commnet

%d bloggers like this: