Simanking Oosii Hmu Pu Thang Tlung Motor Aa Let I A Thi

Salai Biak Za Cung| 2018 January 16| Chin ramkulh Mindat pengkomh Simanking Oosii hmu Pu Thang Tlung cu Hakha in a rian tuannak Mindat a kal lei January 14, Mindat khua luh lai- khan 6 (meng ruk) a hlat nak ah a motor aa let i a hmun ka ah a thi tiah kan theih.

Oosii hmu Pu Thang Tlung kum 48 hrawng cu Hakha in January 11 in aa thawh i Kalaymyo ah a riak pah. Kalaymyo in zeitik a kal ti theih a si ti lo.

“Zarhpi ni (Jan 14) zing sml. 9 hrawng ah a chungkhar phone a chawnh hna. Nikhat ni zing zung a phak ti lo caah Mindat khuachung ah a rian tuanti hawi nih an kawl i an hmu lo. Cu hnu cun khua leng lei ah an kawl nain an hmu kho lo. Nihnih ni ah an kawl i Mindat khualuh lai khan 6 a hlatnak hmun ah aa cit mi Van Car cu lamthlang pe 400 hrawng ah an hmuh i amah Pu Thang Tlung cu a motor in pe 20 tluk a hlatnak ah a ruak in an char. Ruak a hmuh caan hi zinglei sml. 10 hrawng ah a si aa leh caan hi zanlei mui lai hrawng ah a si theo lai tiah an ruah” tiah Pu Thang Tlung te Khrihfabu upa pakhat nih TCP ah a chim.

Pu Thang Tlung motor aa letmi

Pu Thang Tlung hi Thantlang peng, Ngaphaite khuami a si, fanu pahnih le fapa pahnih a ngeih hna. A nupi cu Pi Sui Par a si i Dar Hlei Sung nu le pa tiah auh an si. A nupi le a fale cu Hakha Chin Oo Sii sang ah an um i Calvary Khrihfabu an si. Pu Thang Tlung ruak hi Mindat sii-inn ah an chek lio a si i January ah a ruak Hakha an phakpi lai tiah kan theih.


Leave a Commnet

%d bloggers like this: