Hakha GTI Sianginn In Diploma Degree A Lami 41 Lakah Minung 5 An Qualified
Biak Za Cung | 2018 February 6| Hakha GTI sianginn nih February 4 ah siangngakchia minung 41 cu Diploma Degree an pek hna. Minung 41 chung in minung 5 nih an qualified tiah kan theih.
“Tukum Diploma Degree a lami hi Chin ramkulh pengkip lawng in si lo in Kawlrawn lei in a rak kaimi zong an i tel. Hi Diploma degree cu nikum 2017 ah voikhat le tukum ah avoi 2nak kan pek hna hi a si. Tukum ah degree a lami zapi 41 an si i hi chung ah minung 5 nih an qualified. A qualified mi siangngakcha 5 hi Chinram chung in an si” tiah GTI Principle Dr. Tluang Za Thang nih The Chinland Post ah a chim.
“Hakha GTI sianginn cu 2008 December 8 in rak dirhmi a si i atu hi kum 10 chung a kal ve cang. Hi sianginn ah a kai kho dingmi cu tanghra awngmi an si lai. Asinain siangngakchia an tamtuk ahcun English, Mathematics subject ah mark sang deuh a hmumi lawng kai khawh a si. A ruang cu Kawlrawn lei a rami zong an tam pah ve caah a si” tiah Dr. Tluang Za Thang nih a chimchih.
Atu an pekmi hna degree hi Kawlram chung lawng si lo in Asia ram chung tiang hman khawh a si lai. Cun Diploma in a qualified mi lawng hi Technological University ah kai khawh a si tiah kan theih.+++
About The Author
