Hakha Khua, Hakha Thar Sang Kahdohnak Ah Mipi 2 An I Hliam, Inn Cheu Rawk
The Chinland Post | 2023 November 27 — Chin ramkulh, Hakha khua, Hakha Thar sang ah kahdohnak a chuak i khuami 2 an i hliam, mipi inn cheukhat zong a rawk tiah theih a si.
November 27 zinglei sml 6:30am hrawng ah kahdohnak aa thawk hi a si i Hakha hrambunh IB 266 nih hriamngan a kah caah Hakha Thar, Lung Phun sangmi 2 an i hliam i mipi inn cheukhat zong a rawk tiah Min langhter a duh lo mi Hakha khuami pakhat nih The Chinland Post ah a chim.
“Hakha hrambunh IB 266 nih November 26 zaan sml 12:30am hrawng in hriamngan voi 2/3 a thlah cang. Kahdohnak hi November 27 zinglei sml 6:30am hrawng in aa thawk i sml 8:00am luan tiang cu a thang. Hakha hrambunh IB 266 nih kah mi hriamngan nih Lung Phun sangmi 2 a hliamh hna i mipi inn cheukhat zong a hrawh” tiah a chim.
Ralkap hriamngan ruang ah hliam a tuar mi hna cu thlopbul ding in sizung ah an kalpi hna i Hakha Thar hmundang cheukhat zong ah hriamngan a tlak caah mipi thilri cheukhat a rawk mi zong an um tiah khuami hna sin in thawng kan theih.
Cun, November 27 zing ṭhiamṭhiam ah Hakha in Matupi lei chuahnak Cawbuk gate ah zong ah kahdohnak a chuak tiah theih a si.
Cu ni zing ṭhiamṭhiam ah Thantlang khuachung zong ah kahdohnak a chuak ve tiah theih a si.
Kahdohnak he pehtlai in rianngeitu pawl The Chinland Post nih kan pehtlaih ko hna nain pehtlaih khawh an si lo.
About The Author
