Hakha Khua Passport Zung Ah Kahdohnak A Chuah Hnu In Pengkomh Tai-Yin Sizung Tualchung Mipi Umnak Bom Nih A Khen
The Chinland Post | 2023 June 28 — Chin ramkulh, Hakha khua ah a um mi Passport zung ah SAC ralkap le CDF-Hakha hna karlak ah kahdohnak a chuah dih hnu ah Hakha khua helnak lam (မြို့ပတ်လမ်း) ah a um mi Tai-yin sizung tualchung mipi umnak inn(တိုင်းရင်းဆေးရုံ ကွာတာ) chung ah bom a tla i a puak tiah theih a si.
June 27 zaan sml 8:30pm hrawng ah Hakha khua ah a um mi Passport zung ah himnak a la mi SAC ralkap le palek pawl cu CDF-Hakha nih an kah hna i mins 5 tluk kahdohnak a rau tiah theih a si.
CDF-Hakha rianngeitu pakhat nih “Passport zung chung ah a um mi palek le ralkap hi 10 hrawng an si tawn tiah kan theih. Cun Passport zung rianṭuantu upa pawl zong nih Pistol an i tlaih cio tiah kan theih fawn. Cucaah nizaan kha mins 5 tluk hrawng meithal in kan va kah hna” tiah Khonumthung Burmese ah a chim.
Kahdohnak chung ah SAC lei a thi mi an um le um lo a fiang in theih a si lo. CDF-Hakha hriamtlai pawl him tein an kir kho tiah theih a si.
SAC ralkap pawl nih CDF-Hakha hriamtlai pawl an um lai tiah an ruahdamhnak hmun pawl ah hriamngan lung 3 le meithal in an kah caah khua helnak lam (မြို့ပတ်လမ်း) ah a um mi Tai-yin sizung tual(တိုင်းရင်းဆေရုံး ကွာတာ) ah bom a tla i inn chanphio, thlalaawng hna a rawh leng ah cu inn lonh ah a um mi an sak cuahmah lio mi inn zong kuan tampi nih a khen tiah theih a si.
Hakha khua Passport zung rianngeitu hna nih an zung a rak panh mi mipi pawl kha hrang ngai le bongal ngai in an chawnhbiak lengmang hna tiah theih a si.
June 28 zinglei zong ah Passport zung pawngkam ah SAC ralkap le palek pawl tampi an rak phan i himnak an lak. Passport zung le (စသုံးလုံး) zung zong hman an thlak len tiah Khonumthung Burmese nih a langhter.
About The Author
