Kalaymyo Thlanglei Thasi Khua Kahdohnak Ah SAC Ralkap 30 Leng An Thi
The Chinland Post | 2023 June 29 — Sagaing ramṭhen, Kalaymyo thlanglei, Thasi khuate ah a rak lut mi SAC ralkap 120 hrawng cu PDF phufonh nih an kah hna caah SAC ralkap 30 hrawng an thi/hliam an tuar tiah Ranger Defense Force – RKDF nih cathanh an chuah.
SAC Ralkap pawl cu phu 3 ṭhen in June 25 zinglei sml 7:00am hrawng ah Thasi khualei ah an rak lut i PDF phufonh pawl he chunitlak deng kahdohnak a chuak tiah RKDF nih cun June 27 ah a thanh.
Cu SAC ralkap pawl lak ah pyusawhtee pawl zong an i tel ve i zinglei sml 9:00am in zaanlei sml 5:00pm tiang kahdohnak a fak i SAC ralkap pawl nih mipi inn 7 an khangh.
Kalaymyo thlanglei ah a um mi Thasi khua le Zinkalin khua karlak ah SAC ralkap mawṭaw pawl cu June 25 ah an kah hna tiah CDF-KKG nih an thanh ve.
SAC ralkap pawl cu PHAW mawṭaw 4, Ke thum ngei cycle 1, mawṭaw 2, raltuknak mawṭaw 2 he an rak luh caah RKDF, UGF, Ninja, CDF-KKG, CNDF (VAKOK), PDF-Kalay phu pawl nih an kah hna hi a si.
Kahdohnak chung ah CNDF hriamtlai 1 a nunnak a liam i CDF-KKG hriamtlai 3 le adang PDF chungtel 1 hliam an tuar tiah theih a si.
About The Author
