Hakha khua pawngkam ni 3 chung kahdohnak ah SAC ralkap 9 hrawng an thi

The Chinland Post | 2022 August 5 – Chin ramkulh, Hakha khua pawngkam ah Timit hlei remh ding le hmunhma lak beh ding in timhtuahnak a ngeimi SAC ralkap le Chin hriamtlai phufonh hna cu August 2-4 tiang nithum chung kahdohnak a chuak i SAC ralkap 9 hrawng an thi, hliam a tuarmi zong an um tiah theih a si.

August 2 ah Chin ramkulh Thantlang lei kalnak Timit tiva pawngkam le Lungkhar thlang lei ah hmun 3 ṭhen in a kalmi SAC ralkap le Chin hriamtlai phufonh karlak ah kahdohnak a chuak. SAC ralkap phukhat cu nawi va in lungkhar tlang lei ah an kai i Chin hriamtlai phufonh nih an rak kah hna caah hliam an tuar ngaingai.

SAC ralkap pawl cu an ummnak hmun in an kir lo caah August 3 ah Chin hriamtlai phufonh he kahdohnak a chuak ṭhan. Cu kahdohnak ah CDF-Hakha sniper nih SAC ralkap 3 a ṭhuat hna i cu chungah SAC ralkap machine gun a tlaitu zong aa telh tiah theih a si. Cu ni kahdohnak ah SAC ralkap an thi tiah Hakha Campaign for Justice nih a thanh.

Cun, August 4 zinglei sml 10:45am-11:06 tiang Cawbuk gate a hngakmi SAC ralkap pawl cu Chin hriamtlai phufonh nih an kah ṭhan hna i SAC ralkap 1 a thi, 3 an i hliam tiah a langhter.

Tutan kahdohnak ah CNA, CJDC, CDF-Hakha, CDF- Thantlang, CDF-Zophei le CDF-Lautu hna bawm in kahdohnak tuah a si i aa naih tuk in kahdoh a si ruang, SAC ralkap pawl an an umnak hmun in ṭhial an duh lo ruang le SAC ralkap pawl umnak buk tiang va kah a si ruangah kan Chin hriamtlai phufonh pawl an baa ngaingai tiah theih a si.

Na ruahning rak langhter ve.. (Leave a comment)

%d bloggers like this: