May 21, 2024

Hakha Khuachung Sathahnak License Cawkzuarnak Ah Myoma Sasen Thahnak License Tlai Ngamtu An Um Lo

0

Salai Ngun San Aung| 2018 March 15| Chin ramkulh khuahlipi khuachung sathahnak, Myoma le Ral Dun (Dawrthar) sathahnak license cawkzuarnak cu March 15, Hakha Town Hall ah an tuah i Myoma sasen thahnak license cu a man tam tuk i a tlai ngamtu an um lo.

April 1 in September thla dih tiang thla 6 chung sathahnak license a ngahtu le an tlaih nak man cu, Myoma Vok thahnak tlaitu Sang Hre Ling-18,600,000 MMK. Ral Dun Vok thahnak tlaitu Pu Run Ceu-22,150,000MMK. Ral Dun sasen thahnak tlaitu Pu Tial Thang-20,600,000 MMK an si. Bii khun an ti i motor lutchuak tangka halnak license cu U Thawng Soe nih 2,700,000 MMK in a tlaih. Hakha thar sasen thahnak cu a tlaitu an um lo. Cun Myomya sasen thahnak license cu 22,510,000MMK in an zuar i hohmanh nih an ngamh lo caah a thar in voihnihnak an zuar than lai tiah kan theih.

Hi bantuk in (Kyiankhin zee) license man a tam tuk mi kong ah Sipin tuanvo ngei pakhat nih, “cabawm kau in kan tuahpiak mi hna a si i a man hram kan khiahpiak mi hna cung ah tam bik a chap ngam mi kha license cu pek an si tawn. Nihin ah a hram kan chiah piak mi hna nak a let ti awk in license kha an rak ngamh caah tukum i a hram chiahmi man a tam nak hi a si. Kanmah zong nih hi bantuk in license man tamtuk hi kan duh piak hna lo. License man tam tuk in an tlaih ahcun anmah an sungh lawng siloin sa cawtu mizapi kan sung, sa cuai tlin lo te hna kong khi mah he hin aa pehtlai. A thattu um lo cu a si khawh lo caah a tlamtlinnak in kan tuahpiak than ko hna lai” tiah a chim.

License aa cuh ve mi upa pakhat nih, “nihlawh kan tang lai maw timi tuak lem loin khat le khat i entai nak men ah license man kha sullam ngei lo tiang in kanmah lei nih ngamh kan hman mi nih a kan hrawh dih. Nikum license man chung in zatuak in tukum ah license man kha khiah a si tikah nikum i tam tuk in a caw tu nih khan an kan hrawh khi a si ko. Zoh law anmah hmanh nih tukum an caw duh ti lo cu mu, nikum kha sing 400 leng in an i tlaih tikah tampi an sungh phah tiah ka theih” tiah a chim.

Myanmar Cozah nih tangka kum kha a nicaan an thawn i a hlan ah April thla in tangka kum aa thawk tawn mi kha October in tangka kum thawk ding a si cang caah tu April in September tiang thla 6 ca lawng in tuah a si chung lai i tukum October in tangka kum thawk a si te lai. Cucaah sathahnak license siseh a dang thanchonak rian pawl vialte ca Cozah pek mi rian pawl zong tu April in cun September tiang ca lawng a si rih lai. +++

About The Author

Na ruahning rak langhter ve.. (Leave a comment)

%d bloggers like this: