Hakha Kum 17 Tang Pumpululh Chuih Zuamnak Ah Khuathar Nih Champion An Co
Salai Cung Cung|2018 July 3| Hakha ah Township Support Development Program (TSDP) min bunh in kum 17 tang pumpululh chuih zuamnak final ah Khuathar nih Cawbuk cu 3-1 in an tei hna caah champion an co.
Khuathar nih pakhatnak laksawng ks. 300,000, Cawbuk nih pahnihnak laksawng ks. 200,000 an co. Thiamhlei laksawng cotu hna cu; pumpululh chuih thiam bikmi Khuathar in Tluang Lian, hmaikal ah Khuathar in Moses Kap Cung Nung, alaikal ah Cawbuk in Bawi Tha Peng, hnukham ah Cawbuk in Tluang Uk Thang le goalbawh ah Khuathar in Van Khamh Thang an si.
“Kum 17 tang pumpululh chuih zuamnak kan tuah hnawhchannak a ruang cu aralaimi September thla ah ramkulh le ramthen in kum 17 tang pumpululh chuih zuamnak ca i mi thim kan duh hna caah a si. TSDP min in kum 17 tang pumpululh chuih zuamnak kan tuahmi- tukum hi avoi 1nak a si. Hakha lawng ah si lo in Chin ramkulh pengkip ah an rak tuah cio ve” tiah Hakha peng zaangcelhnak zung in lutlai Pu Jacob nih The Chinland Post ah a chim.
Tutan kum 17 tang pumpululh chuihnak ah aa zuam khomi phu 7 cu; Dawrthar, Kehtheibo sang, Cawbuk, Pyidawtha, Dawrhlun, Khuathar le Hakhthar an si. Tutan ah TSDP min in pumpululh chuih zuamnak lawng si lo in Mini Marathon tlik zuamnak le surlonh chuih zuamnak zong an tuah.
Surlonh chuih zuamnak ah Mitat zung nih pakhatnak, Cawbuk nih pahnihnak, Fimthiamnak zung nih pathumnak an ngah. Laksawng cu; pakhatnak ks. 70,000, pahnihnak ks. 50,000, pathumnak ks. 30,000 pek an si tiah kan theih.
Mini Marathon tlikzuamnak ah aa telmi zapi minung 260 an si. Hi chung ah pa in tlik rang bikmi pakhatnak cu; Dawrthar Siangsangrun then in Pa Hung Man, pahnihnak Pa Ram Uk Lian, pathumnak Pa Bawi Za Lian an si. Nu ah tlik rang bikmi pakhatnak cu No.2 Siangsangrun in Hanah, pahnihnak Nu Cer Chin Sung, pathumnak Nu Van Cer Chin Par an si. Mini Marathon tlik zuamnak ah pakhatnak laksawng ks. 100,000, pahnihnak laksawng ks. 70,000 le pathumnak laksawng ks. 50,000 cio pek an si. Tlikzuamnak in zuamnak man laksawng cotu hna cu pa 10 le nu 7 an si tiah kan theih.
About The Author
