Hakha peng ni 5 chung kahdohnak ah SAC ralkap 25 an thi
The Chinland Post | 2022 October 20 – Chin ramkulh, Hakha peng ni 5 chung kahdohnak ah SAC ralkap 25 an thi i 14 an i hliam tiah CNF nih October 19 ah a thanh.
“Kahdohnak hi nifatin ngawt in a chuak. Kan hnulei te ah vanlawng in bom an rak kan thlak, anmah lei an sungh tuk caah a si. A thi mi an tam ahcun vanlawng a raa lai, vanlawng a rat cun an sungh tuk caah a si” tiah CNF biachimnak nawl a ngeitu Salai Htet Ni nih Mizzima ah a chim.
October 13-17 tiang Timit kiangkap ah SAC ralkap le CNA, CDF phufonh hna karlak ah kahdohnak a chuak i atu bantuk in SAC ralkap tampi an thih hi a si.
Ni 5 chung kahdohnak ah Chin hriamtlai lei in 4 nih ram le miphun caah an nunnak an pek tiah CNF nih an thanh.
October 17 ah SAC ralkap nih Jet Fighter in voi 4 bom a rak thlak ko nain aa hliam mi an um lo tiah theih a si.
Hakha in Furlongs 5 lawng aa hlatnak Timit kiangkap lawng si loin Hakha College, khuachung le khualeng gate pawl hna ah CDF nih an kah hna i SAC ralkap a thi mi an tam tiah Salai Htet Ni nih a chim.
Cu Thantlang le Hakha karlak kahdohnak ah CDF-Thantlang in Commando a simi Salai Biak Than sang (kum 18) nih ram le miphun caah a nunnak a pek tiah CDF-Thantlang nih ngaihchiatnak cathanh an chuah.
Kahdohnak pehzulh in a chuak kho mi a si i tutan kahdohnak hi CNA, CDF-Hakha, CDF-Thantlang, CDF-Zophei le Chin ramkulh hriamtlai phu hna fonh in an doh hna tiah theih a si.
About The Author
