May 20, 2024

Hakha-Thantlang Karlak Kahdohnak Ah SAC Ralkap 20 Hrawng An Thi

0

The Chinland Post | 2023 June 1 — Chin ramkulh, Hakha le Thantlang peng karlak ah CNA, CDF phufonh le SAC ralkap karlak ah kahdohnak a chuak i SAC ralkap 20 hrawng an thi tiah Chin hriamtlai phu nih People’s Spring ah an chim.

SAC ralkap nih May 29 thawk in vawlei lei, vanlei, hriamngan tampi bawm in kahdohnak a tuah i Thantlang le Hakha karlak, Timit pawngkam hrawng ah kahdohnak a fak i May 31 tiang kahdohnak ah SAC ralkap a thi mi an tam i mipi hriamtlai phufonh lei zong in a nunak a liam mi an um tiah theih a si.

“May 31 ah anmah lei 20 hrawng an thi” tiah Chin hriamtlai phu nih People’s Spring ah an chim. Vanlei kahdohnak ruang ah hriamtlai 1 aa hliam. May 29 kahdohnak ah CNA, CDF phufonh lei in 11 nih ram le miphun caah an nunnak an pek.

“Atu ralkap pawl hi Thantlang lei an panh caah Thantlang lei in SAC ralkap phu pawl nih don ding in Thantlang khua in an chuak ve. Kahdohnak a um peng. May 31 ah vanlawng in voi 4 hrawng a rak kah. CNA lei siseh, CDF lei siseh thazang an chap thluahmah ve” tiah a chim.

SAC ralkap pawl hi phu 3 in an cawlcangh caah an kal duhnak taktak hi ruahdamh a har nain Thantlang lei panh dawh an si tiah a chim fawn.

“Thantlang an luh khawh ahcun Thantlang khua pawng sakhaan pawl zong an luh hnawh khawh mi a si. Thantlang ah ṭha tein hmunhma an khuar khawh hnu ahcun Victoria Camp tiang zong an kal kho. Kanmah lei zong a ṭha bik in timhtuahnak kan ngei. Thantlang an rak luh khawh lo ding le an luh khawh sual hmanh ah cawlcang kho lo ding in timhtuahnak kan ngei” tiah a chim.

Thantlang khua ah SAC ralkap nih hmunhma an khuarnak bo lawng an tlaih khawh cang i khuachung hmunhma tam deuh cu CNA, CDF nih an tlaih khawh cang.

About The Author

Na ruahning rak langhter ve.. (Leave a comment)

%d bloggers like this: