June 21, 2024

Hakha-Thantlang Karlak Kahdohnak Ah SAC Ralkap 27 An Thi, Hriam Cheukhat An Lak Khawh

0

The Chinland Post | 2023 June 2 — Chin ramkulh, Hakha le Thantlang karlak ah CNA, CDF le SAC ralkap hna karlak ni 4 chung kahdohnak ah SAC lei 27 an thi tiah CNA biachimnak nawl a ngeitu Salai Htet Ni nih People’s Spring ah a chim.

Hakha le Thantlang peng karlak ah SAC ralkap nih vawlei lei, vanlei, hriamngan hna bawm in kahdohnak an tuah i May 29 thawk in mipi hriamtlai phufonh pawl he kahdohnak a chuah hi a si.

Mipi hriamtlai phufonh pawl an naih hna hlan ah hriamngan, vanlei kahdohnak hna bawm in lam an sial hnu ah vawlei lei in a rak kai mi ralkap pawl he kahdohnak a chuak tiah Salai Htet Ni nih a chim.

“Kahdohnak a chuah leng ah vanlei kahdohnak nifatin in an tuah. Kanmah lei in 12 nih nunnak an pek cang. Hliam a tuar mi pakhat an va bawmh lio ah hriamngan nih a khen hna caah an nunnak a liam hi a si. Kanmah lei nih Sniper zong in kan kah hna. Drone hmang in kan ti khawh tawk kan doh hna. Tuni tiang ah anmah lei in 27 an thi. Phuhnih in a rak kai mi chung ah phukhat cu vawlei lei ralkap an um ti lo. Hnu an kir ma ti cu a fiang in kan thei lo. Meithal zuun 2 le kuan cheukhat kan lak khawh. Kahdohnak hi pehzulh in a chuak peng rih” tiah Salai Htet Ni nih People’s Spring ah a chim.

SAC ralkap pawl hi Thantlang khua an kuttang ah um ṭhan kho ding le Thantlang khua ah ralkap thazang chap kho ding in an i zuam hi a si tiah a chim fawn.

“Hakha le Thantlang karlak ah a um mi kan hriamtlai pawl hrawh cikcek in Thantlang sakhaan ah thazang chap le hmunhma tlaih khawhnak caah kahdohnak an tuah hi a si. Nikum zong ah atu bantuk in kahdohnak an tuah cang. Asinain an kan nam kho lo” tiah a chim.

SAC ralkap pawl cu CNA, CDF-Hakha, CDF-Thantlang, CDF-Zophei le CDF-Lautu hna bawm in an doh hna hi a si.

Thazang 150 hrawng a si mi SAC ralkap nih mipi hriamtlai phufonh pawl an nam kho hna lai lo tiah Salai Htet Ni nih theihternak a tuah.

“A biapi in cu Camp Victoria lei panh an duh. Cubantuk in an kal khawhnak he kan ralkap le kan hriamtlai pawl an nam khawh hna a hau. Asinain in zeitik hmanh ah an nam kho hna lai lo” tiah a chim.

About The Author

Na ruahning rak langhter ve.. (Leave a comment)