Hmun 5 Ah Thlahnih Chung Raltuknak Ngol Dingin Ralkap Nih Thanhca A Chuah
TCP-Thantlang| 2019 July 1| Kachin le Shan ramkulh chung hriamtlai umnak hmun 5 ah thla hnih chungah kahdohnak kan tuah lai lo tiah ralkap lutlai zung nih June 30 ni ah thanhca a chuah.
Kawlram pi remdaihnak lam thlaun chungkal lio ah hin ralkap lei zong nih biatak tein tha pek mi a si bantuk in i hmun nga ah kahdohnak tuah lo ding in August 31 ni tiang thla hnihchung kan chap. Cu pinah tlangcung mi hna nih remdaihnak an i hngahhlangnak, remdaihnak kongah aa teltum mi tuanvo ngeitu phu hna zong nih mah nak in zumhngamnak an ngeih chin khawh nak hnga le karhlannak ding caah a tubantuk in kan tuah hi a si tiah thanhca chuah mi chungah aa tel.
A luancia 2018 December thla thok in ralkap lei nih voi hnih tiang kahdohnak an ngol piak hna i a tu hin a voithum nak kahdohnak an ngol piak cang hna.
Asinain, ralkap lei nih kahdohnak kan ngol tiah nawl an chuah ko nan Kachin le Shan ramkulh hriamtlai sin ah kahdohnak a chuak lengmang than. Mah pin ah Rakhine ram le Chinram kulh zongah Kawl ralkap le AA hriamtlai hna kahdohnak a can liopi zong a si tiah kan theih.
(Ref:VOA)
About The Author
