Hramhram in uknak lak a si hnu ah Khrihfa umnak hmunhma pawl ah kahdohnak a chuak khun
The Chinland Post | 2022 March 9 – Myanmar ram chungah Khrihfa pawl a simi Kayah, Chin le Kachin ram chungah, Khrihfa biakinn le Khrihfa he aa pehtlai mi bu hna cu ralhrang nih timhmi ngei tein a kahdoh tiah UCA News nih capar pakhat a ṭial.
Myanmar ram ah February 1 thok in ralhrang nih hramhram in uknak a lak hnu ah a chuakmi buainak ruangah Kayah ram chungah Khrihfa hmunhma 16 i mipi hna cu himnak hmun ah an zaam ruangah khuapi chungah mipi an king tiah theih a si. A hlan ahcun, fing le tlang hna he hningno tein a ummi nichuah lei Myanmar hmunhma hna ah 2021 May thla thokin kahdohnak fak piin a rak chuak.
Kahdohnak ruangah Kayah ram chungah Roman Catholic members 90,000 chung in cheu thum cheu khat cu inn le lo an zaamtak. SAC ralhrang nih vanlawng le hriamngan in a kah ruangah nu pawl, hngakchia pawl le upa pawl, a pawngkam khua pawl cu Khrihfa biakinn pawl, tlangcung le ramtang hna ah an i dor.
Ram chungah Khrihfa hmunhma 16 chungin Hakha, Kalay, Loikaw le Pekhon peng hna ah February 1 thok in hramhram uknak lak a si hnu ah dai tein duhlo-langhternak le mah le ram i khamnak a rak chuak.
A ngan thluahmahmi buainak ruangah Khrihfa biakinn pawl bom in kahpiak, luhhnawhnak pawl le Khrihfa members pawl le hriam ngei lo mipi tampi an rak thi.
Vanlawng in kahdohnak le kahdohnak chungah Roman Catholic biakinn a tlawmbik 7 hriamngan nih a khen i Khrihfa hmunhma 38 chungin hmunhma 16 ah kahdohnak fak piin a chuak.
Shan ram le Kayah ramri hmunhma cheukhat ah raltuknak kong he pehtlai in buainak tampi ton a si i biakinn pawl, Sister sianginn pawl le biaknak lei hmunhma pawl ah hriamngan a tla.
Ralhrang nih mipi pawl thah, kahdohnak chungah khamnak caah hman tibantuk sualnak hna an buar tiah Foritify Rights Human Rights phu nih a luancia thla ah thawngthanhnak an ngeih bantuk in Karenni Civil Society Network zongah Kayah ram chungah mipi a tlawmbik sing khat le cheu nih inn le lo an zaamtak tiah a langhter. Inn le lo a zaamtakmi hi Kayah ram mipi i hnarcheu zat an si.
Roman Catholic, Baptist le a dangmi biaknak lei thazang a ṭhawnnak Chin ramkulh chungah ralhrang nih tinhmi ngeih tein kahdohnak a tuah. A luancia Christmas ni lai ah Phruso peng, Moso khua ah hngakchia telh in mipi 35 leng ralhrang nih an thah hna i an ruak an khangh hna.
Kayah ram chungah 2021 May thla thokin inn 650 leng a kaang i, khrihfa biakinn, buddhist sianginn le cacawnnak telh in mipi ngeihmi thilri hrawhpiak a si tiah Uited Nation nih a langhter.
Kayah ram chungah, Roman Catholic members 90,000 chungin cheu thum cheu khat cu inn le lo an kaltak. Myanmar ram ah ralhrang nih hramhram in uknak lak a si hnu in a tutiang ah hngakchia a tlawmbik 50 telh in, thah a tongmi mipi 1,600 leng le tlaihkhih tongmi 2,000 leng an si tiah RFA nih a langhter.
About The Author
