Hramhram In Uknak Lak A Si Hnu Ah Mipi Inn 80,000 Deng An Khangh Cang
The Chinland Post | 2023 December 15 — Ralkap Council le a kuttang phu pawl nih 2023 November 30 tiang mipi inn 77,274 an khangh cang tiah Data for Myanmar nih December 13 ah a thanh.
2023 January thla thawk in mipi inn an khangh mi hi a zor ngaingai tiah an langhter.
Data for Myanmar cazin ning ah 2021 February 1 thawk in 2023 July 31 tiang kahdoh a fahnak Sagaing ramṭhen lawng ah mipi inn 57,503 an khangh cang tiah an langhter.
2023 thawk in mipi inn an khangh mi a zor ngaingai nak hi ralkap lei kahdohnak chung ah an sungh thluahmah caah a si tiah Sagaing ramṭhen Wetlet peng PDF ṭuanvo ngeitu nih a chim tiah RFA nih a langhter.
Ralkap phu nih hramhram in uknak an lak hnu 2021 February 1 in 2023 July 31 tiang ralkap le a kuttang phu hna nih mipi inn 77,874 an khangh cang tiah Data for Myanmar nih August 9 ah a thanh.
Cucaah Data for Myanmar cazin ning ah 2023 July 31 in November 30 tiang, thla 4 chung ah mipi inn 2,400 an khangh chap kha hmuh khawh a si.