Hramhram in uknak lak a si hnu ah SAC nih mipi 3,165 a thah, mipi 1 million leng an zaam, inn 19,635 khanghpiak a si
The Chinland Post | 2022 June 6 – Min Aung Hlaing hruaimi ralkap phu nih hramhram in uknak a lak hnu 2021 February thla thok in 2022 May thla tiangah mipi 3,165 a thah hna i peng 86 in mipi inn 19,635 khanghpiak a si tiah Media Monitor Collective phu nih an thanh.
SAC nih peng 86 chung in khuate 400 leng i mipi inn pawl a hrawh i Sagaing ramṭhen chungah inn 12,687, Magway ramṭhen chungah inn 4,304, Chinram chungah inn 1,376, Kayah ram chungah inn 360, thlanglei Shan ah inn 329, Karen ram ah inn 166, Chaklei Shan ah inn 137, Mandalay ramṭhen ah inn 118, Kachin ram ah inn 58, Tanintharry ramṭhen ah inn 37, Mon ram chungah inn 30, Nitlak lei Bago ramṭhen ah inn 26, Yangon ramṭhen ah inn 4 le nichuah lei Bago ah inn 3 a khangh hna.
Cun SAC ralkap pawl nih khuate chung an luhhnawh ruangah mipi 1,210,846 (1 million leng) nih inn le lo an zaamtak i ralkap nih kahthlorh a kahmi ruangah mipi 1,112 hliamhma an tuar tiah a langhter.
Ralkap nih khuate chung an luh lioah a ruang um loin tlaihmi mipi 16,251 an si i khamnak caah hmanmi minung 1,353 an um tiah Media Monitor Collective nih a thanhmi cazin ning in hmuh khawh a si.
About The Author
