Hramhram In Uknak Lak Hnu Kum 3 Chung Ah Hngakchia 500 Leng An Thah Hna
The Chinland Post | 2024 January 2 — Myanmar ram ah hramhram in uknak lak a si hnu kum 3 chung ah ralkap nih sualnak ngei lo minung 4,270 leng an thah cang hna i cu chung ah 11.8/% a si mi minung 505 hi cu kum tling lo hngakchia an si hna tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 December 31 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter.
A thi mi chung ah nu 705 an i tel i tlaih hnu ah thah a tong mi minung 1,547 tiang an phan tiah an thanh.
Sagaing ramṭhen chung ah a thi mi minung a tam bik an si i minung 2,000 deng an phan. Cu hnu ah Mandalay, Magway, Yangon, Bago le Taninthary hna nih an zullh.
Pau Dothlennak chung ah minung 25,656 an tlaih/hren cang hna i cu chung ah minung 19,858 hi atutiang thong an thlak rih hna tiah AAPP nih cun a tial.
Cu tlaih/hren mi hna chung in nu 5,150 an i tel fawn i hngakchia 706 an i tel.
Cun ralkap nih mipi cung ah van lei kahdohnak, bomthlaknak telh in ralkap phu nih hremnak, tlaihremnak hna a karh i a caan a sau ngai cang mi Myanmar ramchung buainak ruang ah Myanmar ram mipi 2 million leng nih innlo an zaamtak tiah UN nih a langhter ve.
About The Author
