Paletwa Khuapi Khawe Byuha Sakhan Le Point 377 Sakhan Cu AA Nih An Laak, SAC Ralkap 151 Cu Mizoram Lawngtlai Peng Tuisenthlang Khua Ah An Zaam Assam Rifles Kut Ah An I Pe
The Chinlandpost | December 30, 2023 — Chinramkulh, Paletwa khuapi ah hmunhma a la mi Khawe Byuha sakhan le India-Myanmar ramri Point 377 (ပွိုင့် ၃၇၇ ခြေကုပ်စခန်း) sakhan cu AA nih an laak cang. Cu sakhan kahdohnak ah SAC ralkap tam ngai an thi i an ruak zong ṭha tein an phum hna tiah theih a si. A sungpe duh lo mi SAC rakap 151 cu Mizoram Lawngtlai peng, Tuisentlang khua um Assam Rifle sin ah an i ap tiah Vanlaini Media sin in theih a si.
December 26, zaan suimilam 9:00am hrawng ah Mauk-U khuapi chung pengkomh palek sakhan cu AA nih an rak lak. December 27 zinglei suimilam 6:10am ah Paletwa khuapi chung hmunhma ala mi Khawe Byuha sakhan an laak ṭhan pinah December 28 zinglei suimilam 9:20 hrawng ah Paletwa peng India-Myanmar ramri um Point 377 sakhan zong a zate in Rakhine ralkap AA nih an lak than hi a si.
Mah point 377 sakhan kahdohnak ah cun SAC ralkap tam ngai an thih pin ah an hriamnam le ralkap nih an hmanmi thilri dihlak cu AA nih an laak i, a thimi ralkap ruak vialte cu an phum dih hna, tiah AA nih an thanh.
SAC ralkap lei hriamnam chia duh lo in a zaam mi ralkap pawl cu Rakhine ralkap AA nih an kawl cuahmah hna lio a si i, hriamnam he aa sungpek mi SAC ralkap belte cu a himnak hmun ah an umter hna.
December 29 chun suimilam 11:00 hrawng le zanlei suimilam 6 hrawngah SAC ralkap 151 cu Mizoram, Lawngtlai pengkomh Tuisentlang khua ah lutin Mizoram Assam Rifle sinah an i pe. Hi a zaammi SAC ralkap pawl hi Point 377 sakhan in a zaam mi an si lai, tiah zumh a si.
About The Author
