Hramhram in uknak lak ruangah ralzaam sing 8 le cheu leng an karh
The Chinland Post | 2022 July 28 – Myanmar ram ah SAC nih 2021 February 1 thok in uknak hramhram in a lak hnuah a chuakmi buainak le him lonak ruangah July 11 tiang innlo a zaamtak mi 895,900 an um tiah UN OCHA nih July 27 ah a thanh.
Hramhram in uknak lak a si hlan ah a um cangmi ralzaam 346,600 he fonh ahcun ralzaam 1.2 million tiang an phan tiah a thanh.
Northeast Myanmar lei ah a cangmi kahdohnak ruangah July thla hramthok ah mipi 18,370 cu himnak hmun ah ṭhial an si tiah July 20 ah a thanh.
July thla hramthok in a zaammi chungah Bago ramṭhen, Kyaukkyi peng khuate 18 in khuami 12,300, Taninthary, thayetchaung peng khuate 7 in khuami 1,000, Mon ram, Tahtone peng ah 1,500, Karen ram, Baan peng ah 500, Kachin ram, Waimaw peng ah 70 le Moekaung peng ah 300 hrawng an i tel tiah July 20 ah a thanh.
A luancia zarh chungah Peng le ramṭhen kip ah SAC ralkap le tlangcung hriamtlai karlak ah kahdohnak aa peh lengmang caah minung le minung i bawmhchanhnak a herh chin tiah a thanh.
Sagaing ramṭhen he a tlaihnak Kachin ram, Phakant peng ah SAC ralkap le KIA karlak ah kahdohnak a fah chin caah mipi hna nih innlo zaamtak a haumi dirhmun an phan ṭhan tiah a langhter.
Cubantuk in Rakhine ram, Maungdaw peng ah SAC le AA karlak ah July 18 in kahdohnak a chuak i Yatetaung peng lei ah himnak a um lo i inn lo a zaamtak mi an um tiah a langhter.