India Nih Mizoram Ram Le Myanmar Ram Tlanglawng Lam Tuahding In Thawngthanhnak A Tuah
Salai Mangpau | 2023 August 11 — Myanmar ram nih kum caan saupi a hngah mi Sittwe tilawng dinhnak onnak a tuah hnu ah India tlanglawng Department nih Myanmar le Mizoram karlak tlanglawnglam tuah ding in thawngthanhnak a tuah tiah Mizzima Daily nih a langhter. Myanmar ramri he naihnak Mizoram Aizawl – Zorinpui in Habitchuwa tiang 223Km tlanglawng lam tuahnak ding ah tlanglawng lam a sau le a kalnak ding vialte mengtung tah a si dih cang India tlanglawng department lei nih an chim. Cun project pi aa lim ahcun Nepal ram le Bhutan ram ca zong ah santlainak tampi a chuah pi lai tiah an chim.
Cu tlanglawng lam thar hi India ram le Myanmar ram komh in project pi a si mi Kaladan_Multi-Modal Kaladan Multi-Modal Transit Transport Project (KMTTP) he ṭuanrel ṭi ding a si lai.
India le Myanmar ram nih 2008 April 2 ah Kaladan Multi-Modal Transit Transport Project (KMMTTP) tiah min thang taktak mi project hi min an rak thut. Kaladan Multi-modal Transit Transport Project hi an ram ah harnak tampi a um caah cu harnak cu tlianter khawh nakhnga India cozah nih ruahnak a chuah mi a si.
Tinh mi cu: (1) India ram rili tilawng dinhnak Kolkatta le Myanmar ram tilawng dinhnak Sittwe tilawng dinhnak peh ding; (2) Sittwe in Paletwa tiang Tipi thuk deuh in tuah le kauh deuh ding; (3) Paletwa tilawng dinhnak a thar in sak ding, (4) Paletwa in Lawngtlai (Mizoram) tiang highway cawh i India nichuah chaklei ramkulh 7 chung ah fawi deuh in, pehtlaihnak tuah ding hi, India cozah tinh mi a si.
Hi nichuahlei ramkulh pa 7 hi rili he an i hlat tuk. Hi ram 7 nih thilri tam bik an laknak cu Kolkata a si. Kolkatta in Mizoram le Tripura ramkulh te hna phak nak ding ahcun Bangladesh nih a kham caah, phihlik khengtlang vel in i vel i phak a hau. Cucaah caan, tangka tamtuk a hlei in a dih.
Atu Kolkatta in Sittwe lei in kal ahcun a tlawm bik ah km 1,328 in lam a tawi deuh lai ti a si. Cucaah Kaladan Project hi an lim ahcun, India ram minung nih caan, tangka le buaibai ah tam tuk an miak ding a si. Cun hi ramkulh 7 hi Bangladesh ram nih India ram a lai zawn in a chah dengmang hna. Kolkatta in Assam le Mizoram lei kal duh tik ah, a bi tuk mi Siliguri ti mi hmunhma te kha, tlanglawng nih a pal peng a hau.
Cuti vel cu a rak har tuk caah, India cozah nih hin Bangladesh hi, Chittagong Port hman in cuticun Tripura le Mizoram lei in kalnak nawl hi a rak hal lengmang nain Bangladesh nih a rak duh hrimhrim lo. Cucaah, India ni chuahlei ramkulh thilri phorhtlunnak ding ah, Kaladan Project cu an tuahnak a si.
Hi nichuah chaklei ramkulh 7 hna cu: Tripura, Mizoram, Manipur, Meghalaya, Nagaland, Assam le Arunachal Pradesh ti mi ramkulh 7 hna hi rili he an i hlat tuk caah, hi ram hna thilri fawi deuh in phorhtlun khawhnak ah aa tinh mi a si. Cun Myanmar-India cawkzuarhnak zong karhter deuh kha an i tinh.
India timh mi project hi ASEAN ram kip ah an business luhter kho ding in timh tuahnak a ngei i, 623Km tlanglam a sau mi India- Myanmar le Bay of Bengal 725Km a sau mi tilam vialte tlaih aa timh hi a si ko.
KMTTP tilam project ah Myanmar ram Sittwe in Kaladan tiva in tlanglam lei kal in Myanmar nitlak lei a um mi Paletwa tiang pehtlainak lam a tuah lai. Paletwa in Mizoram chung Zorinpui khua tiang 62km motor lam pehtlainak lam a tuah lai. Zorinpui khua le Aizawl tiang 110 km motor lam zong an tuah lio pi a si. Mah lam pi ah tlanglawng lam zong an tuah chih. Zorinpui zong check gate pakhat an tuah cang.
KMTTP project hlei ah Bay of Bengal Initiative for Multi-Sectoral Technical and Economic Cooperation (BIMSTEC) project aa simi India-Myanmar-Thailand ram 3 project zong 70% a dih cang i a ruah hlan ah aa lim dih cang lai. Mah ram 3 High way lampi hi Vietnam ram le Laos ram tiang peh ding in timhtuahnak an ngei.
About The Author
