Irrawaddy Thawngzamhca Nih Minister Salai Isaac Khen A Rian Dinhter Nakkong Ah Chin Mipi Nih An Duh Lo Tiah A Langhter
TCP-Online| 2018 May 12| Chin ramkulh Sipin Minister Salai Isaac Khen cu a rian tuanmi a tamtlinh lo ruangah a rian in dinhter rih dingin ramkulh hluttaw Speaker Pu Zo Bawi nih ramkomh President zung ah ca peknak a tuah nain Chin mipi nih Salai Isaac Khen cu a rian dinhter ding in a duh lo tiah Irrawaddy thawngzamhca nih a langhter.
Irrawaddy thawngzamhca nih a langhter ning ah Chin Mino pathum hna biahlanak a tuahnak in a langhtermi a si. Cu Chin Mino hna cu Salai Thatuang, Peter Lawilu le Salai C Lian hna an si.
Irrawaddy thawngzamhca nih a langhter ning cu;
Salai Thatuang
Kum hnih lawng riantuan chungah minung pakhat nih a rian a tlamtlinh lo ti bia khiah khawh a si lo. Minister Isaac Khen nih kum 5 chungah ah zeitindah rian hi a tha bikin ka tuan lai timi timhlamhnak zong a ngei khomi a si. Mah vialte hi hmuh ta rih kan duh. Kei ka hmuhning cun Chin ramkulh Minister chung in rian thlennawnnak ah hin a nih cu aa tel ve dingin ka ruahmi Minister a si lo.
Peter Lawilu
Tutan thlen remhnak kong hi a si khawh cun ka duh lo. A ruang cu cozah rian hi Term khat ah kum 5 tuan ding a si. Cucaah, kum 5 tel cu a kalta awk ding a si. Minister thar hna rak kai sehlaw a hramthok in a rian kha a tuan than lai tikah a tlam zong a tling lo ngai. Asinain, a rian dinhter lo awk dirhmun tiang hna a si ko cun a rian zong cu dinhter ding a si ko. Ziknawh eihmur ruang hna a si ahcun aa dinh awk zong a si.
Salai Clian
Minister Isaac Khen hi a rian kong in vun chim ahcun rian a tuan kho ngaimi a si. A nih cu fimthiam pakhat zong a si i Theory lei zong a thiam ngaimi a si. Nain, Chin mipi hna he i rem lonak tete zong cu a um ve. Cun, tutan ah a mah a rian in thlen an timhmi hi cu a tha tuk in ka ruat lo. Amah ca zong ah ningzak le mualphonak a si.
Minister Salai Isaac Khen cu a rian in dinhter/phuah dingah ramkulh cozah lei nih ramkomh cozah zung ah ca an pek cang ti thawngpang cu atu lio Chin mizapi sinah a linhsat lio le a darh lio caan te a si.
Minister Salai Isaac Khen cu 2015 thimnak ah rak lut balmi a si lo i NLD cozah nih mifim pakhat dirhmun in ruah a si tikah a mah cu Chin ramkulh Sipin le Electric lei Minister rian an pekmi a si.
Note; A cunglei ca hi The Chinland Post nih kan ruahning in ka tialmi a si lo. Irrawaddy thawngzamhca nih a tialning tein kan vun lehmi a si.
About The Author
