July Thla Chung Ah Mipi Inn 2,700 Leng An Khangh Tiah NUG Nih A Thanh
The Chinland Post | 2023 August 4 — Sagaing, Mandalay, Magway, Bago, Taninthary, Kachin le Karen tiah ram le ramṭhen 7 hna ah July thla chung ah sianginn, biaknak lei inn, le mipi inn 2,741 an khangh tiah NUG kuttang meithat zung nih August 2 ah cathanh a chuah.
July thla chung ah SAC ralkap nih mipi inn voi 85 an khangh. Sagaing ramṭhen ah voi 55 an khangh i mipi inn 1,750 a rawk, Mandalay ramṭhen ah voi 7 an khangh i mipi inn 441 a rawk, Magway ramṭhen ah voi 5 an khangh i mipi inn 371 a rawk, Kachin ram ah voi 3 an khangh i mipi inn 97 a rawk, Karen ram ah voi 1 an khangh i mipi inn 4 a rawk tiah cathanh chung ah an langhter.
SAC ralkap pawl nih mipi inn an khangh lio ah Sagaing ramṭhen minung 9, Mandalay ramṭhen minung 3 le Bago ramṭhen minung 3 tiah an zapi 15 an thah hna tiah cathanh chung ah hmuh khawh a si.
Myanmar ram ah SAC ralkap nih hramhram in uknak a lak hnu 2021 February 1 in 2023 June 30 tiang ah ramchung mipi inn 81,899 an khangh cang tiah ISP – Myanmar nih July 28 ah cathanh a rak chuah.
About The Author
