Kachin Minung A Thattu Kawl Ralkap Minung 6 Hna Cu Kum 10 Thong Thlak Dingin Sual An Phawt

TCP-Online| 2018 January 20| Kachin ramkulh Mansi peng Maingkhaung ralzaam hmun ah aa dormi Kachin pa minung 3 cu Kawl ralkap nih a ruang um loin an hriamnaam he an thah hna caah ralbawi minung 4 tel in ralkap pa 2 hna cu January 19 ni khan kum 10 thong thlak dingin sual an phawt cang hna.

Hiti thong thlak dingin sual an phawt hna cu Mansi peng Khah-Mah-Yah 319 khung zung nih bia an ceihmi a si. Kum 10 chung thong thlak pinah thong chung zong ah rian hrangmi tuanter ding in bia cu an chah chih.

Kachin pa 3 an thih ning;

2017 kum May thla lio khan Kachin ramkulh Mansi peng i Maingkhaung ralzaam hmun, RC biakinn ah hmun aa dormi chung in pa pa thum hna cu ralkap nih an auh i inn lei an kir ti lo. Khuami nih an kawl hna i 2017 May 25 ni ah Mansi peng in khan 4 tluk aa hlatnak ah an ruak in an rak char hna.

Ralkap lei nih an cithlat tikah anmah ralkap lila nih an thahmi si ti an hmuh chuah caah mah pathum thahnak i aa telmi ralbawi minung 4 le a thattu ralkap 2 hna cu kum 10 chung thong thlak ding in nizan January 19 ni khan bia an chah cu a si.

Kachin pa pa thum a thimi an chungle nih cu ‘tubantuk in thong thlak ding in bia an chahmi cu kan lung a tling ko. Nain, thong chung ah an chiah taktak te lai maw ti cu kan lung bel a hring ko’ tiah an chim.

Ref;BBC