Kahdaih Hnatlaknak An Tuah Hnu Ah SAC Lei Nih Hriamngan In An Kan Kah Tiah TNLA Nih An Chim
The Chinlandpost | January 13, 2024 — SAC le unau hawikom phu karlak ah January 11 zaan sml 9:00pm thawk in kahdaih hnatlaknak an tuah nain SAC lei nih January 12 ah Lashio, Kyaukme, Tibaw le Mogok pawngkam khuate ah hriamngan in an kan kah tiah Ta-aung ralkap TNLA nih thawngthanhnak a tuah.
SAC nih chaklei TNLA ram Kyuakme peng Hpapoh khua, Tibaw peng Manhe khua, Lashio peng Makhinuh, Kungpong le Einaing khua, Mogok peng cunglei Nyaungkung khua ah hriamngan in an kan kah tiah TNLA lei nih an chim.
1027 operation ah unau hawikom phu 3 le SAC palai hna cu Tuluk ram Kunming khua ah January 10-11 tiang ton biaruahnak an ngeih hnu ah chaklei Shan ram ah kahdohnak ngol ding in hnatlaknak an tuah.
Unau hawikom phu nih chaklei Shan ram ah an lak mi khua pawl cu SAC lei nih vanlawng le hriamngan in kahnak tuah lo ding tiah hnatlaknak an ngei.
Unau hawikom phu 3 nih chaklei Shan ram chung um SAC sakhan, Byuha kung pawl ah kahdohnak tuah ve lo ding in hnatlaknak an ngei ve.
Kahdohnak tuah lo ding in hnatlaknak an tuah mi chung ah tualchung mipi kah, inn mei khangh lo ding timi hnatlaknak an telh chih lo.
TNLA nih mipi lei kahnak tuah lo ding tiah thawngthanhnak an tuah nain SAC lei in bia lehnak an tuah rih lo.
SAC lei thawngthanhnak ahcun dohthlennak phu pawl nih biaknak inn le lo ah hmunhma lak in kahnak an tuah tiah SAC nih a langhter.
Mah thawngthanhnak ah PDF hi ralhrang an si, MNDAA, TNLA, AA pawl zong ralhrang bia fiang an hman tiah Myanmar Now sin in theih a si.
Photo/ Taaung ralkap PSLF/TNLA ralkap bu
About The Author
