Miphun Dang Hriamtlai Nih Paletwa Khuami 2 An Kahthah Hna
The Chinland Post | 2024 January 12 — Chin ramkulh thlanglei, Paletwa khua, January 11 ah khuabawi pakhat le sianguk hlun pakhat cu miphun dang hriamtlai phu nih an inn ah an rak kah hna tiah Voice of Myanmar nih a langhter.
“Khuabawi U Aung Wai le sianguk hlun U Sa Nay Aung hna kahthah an tong, an inn ah an kah hna caah an ruak lawng kan hmuh, Paletwa khuachung hriamtlai phu a si mi AA le MDF nih an rak kah hna” tiah U Aung Wai chungkhar pakhat nih Voice of Myanmar ah a chim.
Adang Paletwa khuami pakhat nih “A luancia ni tlawmpal thawk in Paletwa ah ralkap phu le AA karlak ah kahdohnak a chuak, Paletwa khuami hohmanh inn ah an um ti hna lo, an zapi ngawt in an zaam hna. Cun ti lam le vawlei lam an phih dih caah khuachung ah eidin a dih thluahmah. Dawr zong an khar hna. Eidin a har caah Paletwa in zungzal ca aa ṭhial mi zong an karh. Khuachung zung rianṭuantu pawl zong an um ti lo, an zaam dih ve. A luancia kum 3 chung ah Khumi miphun calei a thiam mi minung 20 an thah hna, cucaah khua a zaamtak mi an tam” tiah a chim.
Paletwa peng hi 2014 tiang cazin ning ah minung 60,000 hrawng an um. A luancia ni tlawmpal chung kahdohnak ruang ah khua 30 leng in a zaam mi 20,000 hrawng an um tiah Voice of Myanmar nih a langhter.
About The Author
