Kahdohnak voi 20 leng ah SAC ralkap 60 hrawng an thi tiah KNU nih a chim
The Chinland Post | 2022 August 24 – Kawlaythu tlaihnak hmunhma, Nyaunglaypin pengkomh, thla cheu chungah KNLA battalion 3 le SAC ralkap karlak ah kahdohnak voi 20 leng a chuak tiah KNU nih a thanh.
Kahdohnak chungah SAC ralkap 60 deng an thi i a thimi chungah Battalion Commander le Deputy Battalion Commander hna an i tel tiah a thanh.
August 1-15 tiang KNLA battalion 3 le SAC ralkap karlak ah kahdohnak voi 25 a chuak i SAC ralkap lei in ralbawi pawl telh in 57 an thi i 36 an i hliam tiah a langhter.
KNU tlaihnak hmunhma ah SAC nih vanlawng in kahdohnak voi 3 a tuah tiah a chim.
Culengah SAC ralkap nih mipi 45 an tlaih hna i 2 an thah hna lengah khua chungah hriamngan in a kah hramhram i mipi 3 an i hliam tiah KNU nih a thanh.
SAC ralkap nih mipi zuatmi saṭil, tangka le mansung thilri tampi a fir i mipi inn tampi zong an hriamngan ruangah a rawk tiah KNU nih a thanh.
KNU battalion 3 hmunhma chungah SAC ralkap nih kahdohnak an tuah i sual an buar lengmang ruangah mipi 61,898 cu himnak hmun ah an zaam i bawmhnak an herh ko tiah a thanh.
About The Author
