Malaysia ah thlathum chungah phunglut lo Myanmar rammi 3,000 deng an tlaih hna
The Chinland Post | 2022 August 24 – Malaysia cozah nih a ram chungah phungning loin a rak lutmi a tlaih hna i cu chungah Myanmar rammi tampi an i tel tiah VOA nih a chim.
Permit a dih cang ko nain phunglut loin a um pengmi, rian a ṭuanmi telh in ramri lonh in phungning loin a rak lutmi Myanmar rammi a za leng in an tlaih hna. Thla 3 chungah tlaih a tongmi Myanmar rammi 3,000 hrawng an um tiah theih a si.
Tlaih a tongmi hna hi Myanmar ram ah hramhram in uknak lak a si hnuah harnak tampi, tlaihkhihnak tampi lakah a si khawhnak in a rak chuakmi an si tiah Rakhine ralzaam phu Director U Nyi Nyi Lwin nih VOA ah a chim.
Cu chungah Rakhine miphun 1,000 hrawng an i tel tiah a chim.
Tlaih a tongmi a tam deuh hi biaceih zungah bia an khiah hna hnuin thong an thlak hna. Thong an tlak caan a dih tikah Lah-wah-kah nih an hren ṭhan hna i ramkhel buainak he a pehtlai lomi lawng kha Myanmar Embassy he an pehtlaih hnu ah an umnak hmun an kuat ṭhan hna. Kuat ṭhan a ngah lomi kha cu Lah-wah-kah nih an hren ko hna tiah U Nyi Nyi nih a chim.
Selangor State, Kajang, August 8 ah Myanmar ranmi 100 deng an tlaih hna lioah NUG nih Malaysia cozah sinah nawlnak a tuah hnuin an tlaihmi hna hi thongthlak loin biaceih zung ah tangka an liam ter hna i camp ah kirter ṭhannak program an tuah. Vanlawng ticket tawlrel dih hnu thlakhat chungah umnak hmun kirding caan an pek hna tiah theih a si.
Thai-Malaysia ramri, Kelantan ah Myanmar rammi an tambik an tlaih hna i an hren hna. Cun a pahnihnak cu rianṭuannak sehzung a tamnak Juho a si i a pathumnak cu Kuala Lumpur a pawngkam khua hna an VOA nih a langhter.
About The Author
