Kalay Airport An Kauh Chap Lai
TCP-Online| 2018 August 4| Kalay Airport cu 2019-2021 tangkaa kum ah Kyats nuai 700 dih in kauh chap le remh chap a si lai tiah ramkomh Ministry of Transport & Tele Communication Minister chang U Kyaw Myo nih a chim.
August 3 ni ah tuahmi a voi hnihnak caan hmaan Amyotha hluttaw a voi 9 nak tonnak an tuah lioah Falam peng in MP Pu Zung Hlei Thang nih Kalay Airport kong ah remh chap le kauh chap dingin timhlamhnak a um maw, um lo ti biahalnak a tuah ah Minister U Kyaw Myo nih tuabntuk in a leh hi a si.
U Kyaw Myo nih “Kalay Airport cun ramkomh cozah lei nih 2019-2021 tangkaa kum ah Kyats nuai 700 dih in kauh e remh chap kan tim ko”tiah a chim.
Kalay Airport innpi cu pee 120×60 a kaumi a si i 2019-2021 tangkaa kum ah pee 120×100 kau in remh chap le kauh chap kan tim. Mah Airport ca hin 2019-2020 kum ah Kyats nuai 400 le 2020-2021 kum ah Kyats nuai 300 khon dingin timamhnak kan ngei cang, tiah U Kyaw Myo nih cun MP Zung Hlei Thang biahlami a leh.
Kalay Airport cu 1945 kum ah rak thok in vanlawng a rak tum cang i vanlawng a cawlcanghnak ding ah lam cu a sau pee 7000 le a kau pe 100 a si. Kalay Airport ah Myanmar National Airline nih Yangon-Mandalay-Kalay tiin zarh khat ah ni 4 le Air KBZ nih Yangon-Mandalay-Kalay ah zarhkhat ni 6 tiin nicharte an kal tumnak hmun Airport pakhat a si.
Ref: Zalen
About The Author
