Kalay Peng Kahdohnak Ah Dothlennak Phu Lei Hriamtlai 10 An Nunnak A Liam Cang
The Chinland Post | 2024 February 27 — Sagaing ramṭhen, Kalay peng ah February 21 thawk in nihin tiang a rau i nihin ah dothlennak phu lei hriamtlai 5 nih an nunnak an pek chap tiah theih a si.
February 26, nizaan ah a cang mi Kalay University kahdohnak le Kalay peng chaklei kahdohnak ah kutzung ding Sniper telh in mipi hriamtlai 5 an nunnak a liam.
A nunnak a liam mi hna hi Kalay pengkomh SR-6 chungtel Kang Sian Mung, Kalay pengkomh SR-6 chungtel Thian Za Cung, CDF-KKG chungtel Salai Lian Sang, CNA ralkap Sniper Hmangaih Zuala le adang CNA ralkap pakhat hna an si.
A nunnak a liam mi hna chung ah CNDF Second Commander In Chief Salai David New @ Joshuah (VCS/CNDF), Mai Sui Nuam Kim @ A Nag le Salai Amos Van Neih Lian hna hi Operation tuah ding in an kal lio ah SAC kuttang pyusawhti pawl nih an rak tlaih hna i an thah hna a si i Salai Mang Phi @ Lah Phi hi Sakan khua kahdohnak ah bomrap in a nunnak a liam. Kalay pengkomh SR-6 chungtel Ko Thae hi cu Kangyi khua kahdohnak ah a nunnak a liam.
February 21 in February 23 tiang nithum chung kahdohnak ah SAC ralkap nih hmunhma an khuarnak Sekan khua, Kangyi khua, Kantha khua hna cu dothlennak phu pawl nih an lak khawh i kahdohnak chung ah SAC ralkap lei Captain telh in 15 an thi, 10 an i hliam.
About The Author
