Kalay Peng Kahdohnak Chung Ah Mipi Hriamtlai Phu Lei 5 An Nunnak A Liam
![](https://i0.wp.com/thechinlandpost.info/wp-content/uploads/2024/02/Kalay-kahdohnak-ah-dothlennak-phu-lei-5-an-thi_2024-Feb-26.jpg?fit=640%2C427&ssl=1)
The Chinland Post | 2024 February 27 — Sagaing ramṭhen, Kalay peng chaklei le 9 Miles Kalay University kahdohnak ah dothlennak phu lei hriamtlai 5 nih ram le miphun caah an nunnak an pek tiah theih a si.
February 26 ah Kalay peng ah kahdohnak a fak cang i SAC ralkap lei nih hriamngan le Jet Fighter hmang in van lei kahdohnak a tuah tiah Zalen nih a langhter.
Kalay peng chaklei kahdohnak chung ah SR6, in hriamtlai 2, CDF-KKG in hriamtlai 1, 9 Miles Kalay University pawng kahdohnak ah Chin Rifle in hriamtlai 1 le CNA Sniper ralkap 1 tiah dothlennak phu lei 5 an nunnak a liam.
“February 26 zinglei in hriamngan an kah i zing sml 7:00am hrawng ah Kalay thlanglei cu Jet fighter nih a kah. Chun tiang a naih tein kahdohnak a um. Kalay thlanglei ah hriamtlai 3 an nunnak a liam. 9 miles lei ah 2 an nunnak a liam” tiah dothlennak phu lei chungtel pakhat nih Zalen ah a chim.
Cun February 27 zong ah Kalay khuachung lam thluangthluan ah kahdohnak a fak ngaingai i bom khor ah kan i thup hna tiah Kalay khuami nih The Chinland Post ah a chim.
“Khuachung kahdohnak hi kan i naih ngaingai. An thawngpang zong a sau. Himnak hmun bom khor ah kan i thup hna” tiah a chim.
February 26 lawng ah SAC lei nih hriamngan voi 70 nak tlawm lo a kah i February 21-26 tiang SAC lei kah mi hriamngan ruang ah mipi 7 an thi cang tiah thawng theih a si.