Kalay Peng Siang Cachim 61 Nih Cozah Sianginn Minung 1500 Renglo Sin Ah Laica An Chimh Cang Hna Lai
Salai Cung Cung|2018 May 24| Chin Funtomnak Bu (CFB) le (CACC) hruainak in Laica TOT (Training of Trainer) cawnpiaknak cu Kalay CBA le COTR Biakinn ah an tuah i siang cachimtu minung 61 nih cozah sianginn siangngakchia 1500 renglo sin ah Laica an chimh cang hna lai tiah kan theih.
Hi traning a petu hna cu Dr. Sang Hlei (Professor, Kalay University) le Pastor Lai Cung (CACC) an si, siang cachim minung 61 an kai kho tiah theih a si.
“Hi traning cu CFB ( Chin Funtomnak Bu) le CACC hruainak in Kalay CBA (Chin Baptist Association) le COTR ( Church On The Rock) ah 2018 May 22-23, in kan tuah i siang cachim 61 traning kan pek hna. Kalay peng um cozah sianginn cachim ding ah minung 61 cu nihnih chung Laica chimh ning traning kan cawnpiak hna. Hi siang cachim 61 cu cozah lei nih rian pek an si rih lo, kum dongh lei ah rian pek an si te lai. Atu June thla in hin an thawk cang lai i cozah sianginn ah siangngakchia 1500 renglo cu Laica an chimh cang hna lai” tiah CACC in caholh lei tuanvo ngeitu Pastor Lai Cung nih The Chinland Post ah a chim.
Hi Laica cawnnak traning cu Gangaw lei zong October thla ah tuah than kan timh. Gangaw lei cu Laica lawng si lo in Lai holh zong kan chim chih hna lai. Annih cu Lai holh zong an thiam tuk lo caah holh he ca he kan chimh chih te hna lai. Gangaw peng lei cozah sianginn Laica chimtu minung 39 cu cozah nih rian a pek cang hna i minung 51 hi zaanghleicawi in Laica a chimmi an si” tiah a biapeh ah a chimchih.
Hi Laica cawnnak ti mi hi Kawlram cozah thar NLD an kai hnu in mah le holh le ca cio in cozah sianginn ah cacawn khawh a si tiah an ti caah tu bantuk in Laica cawnnak traning an tuah hi asi. Hi Laica cawnnak traning cu kan hnu kum Hakha le Thantlang zong ah an rak tuah bal cang tiah kan theih.
About The Author
