Kalay-Tamu Lampi He Meng 2 Aa Hlatnak Malu Khua Ah SAC Nih Jet Fighter In Kahdohnak A Tuah
Salai Mangpau| 2023 August 19 — Tamu peng, Kalay-Tamu lampi he meng 2 aa hlatnak, Bokkan khua pawng ah a um mi Min Lu (Ma Lu) khua cu SAC ralkap nih August 18, zaan suimilam 8:11pm ah Jet fighter in voi 2 bomb a rak thlak hna tiah Khit Tit Media nih a langhter.
Tamu-Kalaymyo lampi in Min Lu (khuami nih Malu tiah an auh mi) khua cu meng 2 hrawng aa hlatnak ah a um mi a si. Phone line a ngah lo nak hmun a si caah kahdohnak thawng tling tein theih a si rih lo.
Tamu pengkomh chung a um mi Malu khua ah August 18, zaanlei suimilam 2:00am hrawng in kahdohnak a um. Kahdohnak a fak ngai. SAC lei nih vanlawng in an kah. Tualchung mipi inn a rawk zat theih a si rih lo tiah Tamu um khuami sin in theih a si.
“SAC ralkap hna hi kahdohnak ah an ralkap an thi mi an tam caah bawmtu ding in Jet fighter nih bomb an rak thlak hna, tualchung mipi hliamhma tuar mi an um hraw lo. Bokkan khuami le Malu khuami 500 leng cu India, Manipur ram lei ah ni an zaam hna” tiah PDF lei nih an chim.
August 18, Tamu khua YCDC area chung kahdohnak ah National Liberation Army (N.L.A), CNDF, Thado Defence Army (TDA) tamrual phu hna nih zan lei 2:00pm in kahdohnak an tuah i suimilam 5 chung kahdohnak a um. Zaan 8: 11pm ah SAC jet fighter nih voi 2 bomb a rak thlak. Kahdohnak chung ah SAC lei a thi mi an tam, August 19 ni tiang kahdohnak a um ko rih tiah theih a si.
About The Author
