Kalay Thonginn Ah Lenhloi Saya Telh In Ramkhel Kong Ah Minung 50 Leng Damlonak In A Zual Mi An Tam
The Chinlandpost | January 14, 2024 — Sagaing ramṭhen, Kalaymyo thonginn ah SAC ralkap nih tlaih ruang ah lenhloi saya Cesinyaung telh in ramkhel ruang ah thongtla minung 50 leng cu a dam lo mi an tam, SAC nih uknak a lak hnu in ramkhel kong ah thongtla 800 leng an um cang tiah MFP nih an chim.
Kalaymyo thonginn ah SAC nih uknak a lak hnu in mipi an tlaih hna i thongtla mi ah Pa le Nu an dihlak deng an dam ti lo, cu hna chung ah minung 10 hi an nunnak caah thinphan a si ko tiah thongtla he naihniam mi hna sin in theih a si.
“A zaw mi ah pa le nu an i tel. Nu tak pum chung ah kuan a um nain operation an tuah rih lo. Cun sii le mipi ralkap chung in pa pakhat cu a mit a caw. Biaceih ni hmanh ah zung a chuak kho lo. An hremnak ah kutke a kiak mi zong an um. Thonginn um pawl an zaw caan ah Paracetamol lawng an pek hna. Lenhloi saya Cesinyaung telh in minung 10 cu an damlonak a zual” tiah thongtla mi hna sin in theih a si.
Ramkhel kong thongtla mi cu thonginn khaan khat cio ah an chiah hna. An ke ah cincik an khih hna. Cun zarhkhat ah voikhat sa pek ding zong a um tuk ti lo, an kan pek hmanh ah tlawnte lawng an kan pek. Minung nunnak caah vitamin pakhat te hmanh a tel lo” tiah thongtla chuak sin in theih a si.
December 28 ni ah Kalaymyo thonginn in ramkhel thongtla mi hna nih an ban ah puansen he thonginn ah dohlonak an langhter. Thongtla mi hremnak tuah ti lo ding, a thiang mi dinti pek le takkholhnak caan tha tein kan pe uh tiah sandah-dohlonak an langhter tiah theih a si.
Kalaymyo thonginn ah SAC nih uknak a lak hnu in ramkhel kong he pehtlai in thongtla minung 800 leng an um cang. Ramkhel thongtla chung in Salai Van Biak Him cu thonginn ah sii thlop lo in a um ruang ah August 6,2023 ni ah a thi.
About The Author
