Kalaymyo Ah Hriamngan Kah Ruangah Mipi 6 An Thi, Hliamtuar 26 An Si
Salai Mangpau | July 25, 2023– Sagaing ramthen, Kalaymyo peng ah SAC ralhrang nih hriamngan in kah ruangah khuachung le khuate ah hriamngan in an kah lengmang ruangah mipi a thi mi le hliamtuar an tam, mipi inn a rawk mi zong a tam cang tiah a si.
June 1 – July 20 thla khat leng ah hriamngan kah ruangah mipi 9 an thi i hliamtuar mi 26 leng an si.
SAC lei nih runvennak an laknak hmun le an ralkap pawl umkalnak lam deuh ah nifatein hriamngam kahnak le bom puak a tam caah Kalay khuachung um mipi pawl cu thinphan in an um ko.
“July thla chung khua chungah SAC lei hriamngan kahnak voi 10 leng a um i cheukhat inn ah a tla. Ralhrang nih an duhnak paoh ah hriamngan kahnak an tuah lengmang caah kan inncung ah hriamngan zeitik aa tla sual te hnga tiah thinphan in kan um ko” tiah khuachung pakhat nih RFA ah a chim.
Hriamngan kahnak a tuahmi ralkap bu cu Kalaymyo hrambunh, keralkap battalion-365, battalion -228, Regional Operations Commands (ROC) (ဒေသကွပ်ကဲမှု စစ်ဌာနချုပ်) Kalay hna nih hriamngam kahnak an tuah ton.
Cucaah Kalaymyo khua chung pawl cu Meithal le hriamngan runvennak ah mi ngei/mi rum deuh nihcun, bomralvenak khur le vawlei tang inn khan an co/ tuah hna tiah theih a si.
Khuachung ah SAC nih ruahlopi in mi an check ton hna. Mipi ralkap he pehtlainak a ngei tiah ruahdamh mi cu an tlaih thluahmah ko.
Khuachung Bogyoke lam a umkal mi motor cycle ai citmi le phone an check ton.
Kalaymyo khuapawng kahdohnak a um peng ruangah khuate cheukhat mipi cu kalaymyo khuachungah ralzaam an um. Sihmahsehlaw khuachung zongah himnak a um kho hlei lo tiah khuachung a zaam mi khuate mi sin in theih a si.
“kan tih ruangah ralzaam in kan um. Kan umnak hmun kip ah bom, meithal kahnak thawng kan theih penglenmang, zeitik canah kan inncung bom a tla lai tiah thinphang in kan um ko. Khuachung zong ah himnak hmun a um hlei lo. Hmailei kan khuasak timhtuknak zei kan lawh te lai ti”, tiah khuami pakhat nih a chim.
SAC nih uknak alak hnu in nihin tiang Kalaymyo pengah kahdohnak a um peng raungah inn le lo a zaam tak mi 50,000 hlei an um cang tiah Kalaymyo peng ralzaam zohkhenhnak bu sin in theih a si.#
About The Author
