Major General Ko Ko Maung Tlaih Hnu Ah Kanpaikti Ramri Cawng Battalion Commander Lt Gen Hla Moe Tlaih than An Timh
Salai Maungpau | July 25, 2023 — Kachin ramkulh, Myitkyina hrambunh Northern Commanders Major General Ko Ko Maung, Deputy Commander Brigadier Aung Myo Oo, Colonel Aung Kyi Lin (Border Affairs Minister), Hpakant Camp Commander le Officers-2 hna tlaih an si hnu ah, atu Tuluk (China)-Myanmar ramri Boarder trade gate hngak Kanpaikti khua hrambunh ralkap LID 389 battalion commander Lieutenant Colonel Hla Moe zong SAC nih tlaih ding in nawl a chuah cang tiah Kachinwaves nih a thanh.
Kanpaikti gate in hriamnam a bik in kuan le zen pawl ramchung lutnak gate pakhat a si tiah SAC lei nih thawng an theih caah mahbantuk in tlaih an timh hi a si tiah an ti.
July 23 ah Sa Dung khua SAC ralkap le Lisho Pyi Thu Sit (militia) ralkap fonh in mi 60 nih LID 389 commander Lt. Colonel Hla Moe tlaih ding ah an kal. Commander pa Kanpaikti gate in a tli sual lai tiah an va tlaih timh hi a si. July 24 tiang an rak kir rih lo. Tangka ei hmur mi a tam. Kuan le zen ramchung lutpinak ruangah kan hnu lei ah Northern commanders bawi liam mi 6 an tlaih hna hnu in a tu battalion chung a ummi bawi hi tlaih than an timh hi a si ko” tiah naihniam SAC ralkap sin in thawng kan theih tiah an chim.
Cun, Myitkyina-Bhamo lam LID 321 bawi pakhat Kazu khua gate hngak bawi le Kandaung khua gate hngak bawi zong tlaih an si tiah a chim chap.
Northern Commander Major General Ko Ko Maung le a kuttang um ralbawi ngan 6 cu July 13 zan 8:30 Pm ah SAC head Quarter umnak Naypidaw zung in an rak tlaih hnu ah Major General Ko Ko Maung ai ah Kalaymyo hrambunh 10th Military Operations Command (MOC-10) စစ်ဆင်ရေးကွပ်ကဲမှုဌာနချုပ်, စကခ -10 Commander Brigadier General Soe Hliang cu Northern Division Commander ah an chiah tiah theih a si.#
About The Author
