Kalaymyo Peng Ah Vok Pulrai A Um, Vokthi A Thi Pawngkam Tiva Ah An Hlonh Tam Caah Sathu Rimchia An Celh Lo
Salai Mangpau | August 30, 2023 — Kalaymyo peng khuachung le khuate kip ah vok pulrai a um i a thi mi an tam ngai. Cheukhat cu vok thi mi khur ah phum lo in khuahcung tiva (U Poh chuang- Tuiro va- Thlamual lui va le Buda (carciwin) kalnak tiva ah an hlonh ruang ah khuachung cu sathu rimchia in a um ko tiah tiva pawngkam um sin in theih a si.
“Tu lio cu fur caan a si tik ah ṭhal caan lio hnawmchia an hlonh mi rim le vok thi sathu rim chia a nam tuk. Cun cheukhat tiva pawng inn ngeitu hna nih an zuun/ek inn khur pe 2-3 thuk lawng in khur an co, fur caan poah ah an ek cu khur pipe on in zuun/ek cu tiva chung ah an thlak/ an luanter. Tiva Pawngkam khuasa mi le aa chawk mi pawl nih a rim kan celh hrim lo. Minung ngandamnak tiang chiatnak a chuah pi kho mi a si. Rawl ei khawh lo tiang in a rim celh a si lo. Vok a zua mi hna nih an vok a thih sual ahcun dum chung silole khua leng ah vok thi phum hna seh law a ṭha” tiah tiva pawngkam a um mi sang upa nih a chim.
“Kalaymyo khuachung sang kip/khuate inn zuat vok tam ngai an thi cang. Bazaar ah vok sa cuaikhat hi kyat 20,000 in an zuar tawn. Atu ah inn lak thah mi vok cuaikhat hi kyat 15,000 hna in an zuar. Cheukhat cu vokthi mi cuaikhat ah kyat 20,000 in an zuar I zei thei loi n voksa an cawk sual ṭheu tawn. Vok man a tla ngai. Hlan ah sumhnga vok a man ah kyat 300,000 hrawng a si mi kha atu ahcun kyat 150,000 in zuar a si cang. Vok pulrai ruang ah India ram le peng dang lei vok a kal kho ti lo” tiah khua upa sin in theih a si.
About The Author
