Kalaymyo Peng Vok Tlangrai Ruang Ah A Thimi An Tam _ Vok Man A Tla Ngai

Salai Bawi Lian Sang| TCP-Kalay| November 23, 2020| Kalaymyo peng khuachung le khuate kip ah vok rai a um i a thimi an tam ngai. Peng saram lei zohkhenhnak zung lei in tuan vo ngei tu nih Madalay saram rai check nak zung ah Laboratory an kuat tiah thawng kan theih.

“Kalaymyo khuachung sang kip/khuate inn zuat vok tam ngai an thi cang. Bazar ah vok sa cuai khat kyat 8000 an zuar ton mi a tu ah inn lak thah mi vok cuai khat kyat 5000 in an zuar. Vok man a tla ngai. Hlan ah sumhnga vok a man ah kyat 250,000 hrawng a si mi a tu ah kyat 150,000 in zuar a si cang. Covid-19 pulrai ruang ah India ram lei vok a kal kho ti lo. Cun, mibu tampi telh in thlacam pumhnak, thitumhpuai le puai dangdang tuah a si kho lo tik ah vok a man kho ti lo” tiah Sanmyo sang vok zua tu pakhat nih TCP ah a chim.

Sagaing ramthen saram zohkhenhnak zung lei nih november (7) ni ah Vok Laboratory an rak check. Africa vok rai virus phun bantuk an rak hmuh i vawlei cung saram ngandamnak bu (OIE) ah thawngthanhnak an tuah cang.

Mah Africa vok rai hi minung ah zawtnak a chawnh kho lo. Vok rawl caah Rawldawr/inn ei bang mi rawl pek tik ah lum te in chumh piak ding le ramdang in phun ning lo in a lutmi vok sa, vok sa car, vak ril le a dang vok sa in tuah mi ei-din vial te ei rih lo ding a si lai. Inn zuat vok ruahlo pin a thih ah cun mah umnak neihniam mi khua bawi, saram lei zohkhenhnak zung ah thawngpek cawlh ding tiah saram lei zohkhenhnak zung in ralring pek nak thawng theih a si.