Kanan Khua Bomthlaknak Ah A Thi Mi Mipi 17 Chung In Hngakchia 9 An I Tel
The Chinland Post | 2024 January 10 — Sagaing ramṭhen, Tamu peng, Kanan khua cu ralkap nih vanlawng in bom a thlak ruang ah mipi 17 an thi i cu chung ah hngakchia 9 an i tel tiah NUG nih cathanh a chuah.
January 7 zing sml 10:00am hrawng ah Tamu peng, Khampat khua pawng um Kalay-Tamu lam ah a um mi Kanan khua sianginn le biakinn pawng cu pumh kal lio, mi an tam lio ah bom voi 2 a thlak.
Kum 5 in kum 17 kar hngakchia 9 telh in mipi 17 an thi i a hliam mi minung 19 an um tiah NUG, Ministry of Defense nih thawng a thanh.
Kum 5 in kum 17 kar hngakchia a thi mi hna hi Pa Steven (kum 5), Pa Myo Thura Lin (kum 6), Pa Lal Thang Lian (kum 7), Pa Kap Shan Khaing (kum 7), Nu Thang Ne Mar (kum 11), Nu Nuam Ning Maw (kum 13), Nu Thin Hnem (kum 14), Pa Lal Nun Maw Yaw (kum 16) le Pa Uk Thang Lian (kum 17) hna an si.
Adang mipi a thi mi pawl hi Pi Hup Pen (kum 70), Pu Sa Lam (kum 29), Pa Aa Yaw Thang (kum 29), Pi Sui Cin Par (kum 52), Pu Van Pek Awr Thang (kum 42) hna an si.
“Bom a thlak hi zarhpi ni pumh caan a si, a voikhatnak a thlak ah biakinn in an zaam dih hna, cubantuk in an zaam tik ah a voihnihnak bom nih a khen hna. A nunnak a liam mi minung 17 cu a zaanlei ah vui colh an si. Khuapi ning in lungfah le ngaihchiat a si” tiah Kanan khuami pakhat nih a chim.
“Cheukhat cu khua in meng 3, meng 5 hrawng aa hlatnak lo ah an zaam. Sianginn he aa naih mi inn pawl lawng an zaam, 30/40 hrawng. A tlak ṭhan sual cun cuka hmunhma pawng ah a tla sual lai ti kha an phang” tiah Kanan khuami nih Khonumthung Burmese ah a chim.
Hramhram in uknak lak a si hnu 2021 February 1 in 2023 December 31 tiang ralkap phu nih kum 18 tang hngakchia 827, nu 1,017 an thah cang hna tiah NUG cozah nih a thanh.
Cun khuate kip ah vanlawng kahdohnak voi 583 a tuah caah mipi 897 an thi, biakinn 76 le sianginn 52 a rawk tiah theih a si.
Cubantuk in sual buarnak ah nawl a petu, a tuahtu, thazang a petu vialte le ṭuanvo ngeitu vialte cu a dotdot in ramchung biaceihnak phung in tlaih le dantat an si lai tiah NUG cozah nih a thanh.
Kanan khua cu vawlei lei kahdohnak zeihmanh um lo pi in vanlawng nih bom a thlak hi a si i biakinn le sianginn telh in mipi inn tampi a rawk tiah theih a si.
Kanan khua hi PDF nih an uknak Khampat he aa peh mi khuate a si i Chin miphun a tam-u nih khua an saknak khuate pakhat a si.
About The Author
