Paletwa Pawng Um Ralkap IB 308 AA Nih An Lak
The Chinland Post | 2024 January 10 — Chin ramkulh, Paletwa khua pawng ah a um mi ralkap IB 308 sakhaan cu AA nih an lak khawh tiah January 9 ah cathanh an chuah.
Paletwa khua pawng ah a um mi ralkap MOC 19 kuttang IB 308 cu AA nih ni 6 chung an kah hnu January 6 ah tlamtling tein sakhaan an lak khawh i ralkap ruak le kuan pawl zong an lak khawh tiah cathanh chung ah an langhter.
January 9 zong ah Paletwa khua pawng ah AA le ralkap karlak ah kahdohnak a fak i ralkap lei nih hriamngan, Jet vanlawng hna hmang in kahdohnak fak a tuah ve nain AA lei nih ralkap battalion pawl le sakhaan pawl la kho ding in kahdohnak fak taktak a tuah tiah theih a si.
Paletwa peng nitlak lei, Pi-chaung hmunhma ah a um mi ralkap battalion, sakhaan zapi cu AA nih an lak khawh cang i Myanmar-India ramri um sakhaan pawl zong AA le Chin hriamtlai phu a si mi MDF nih an kah i an lak khawh cang.
About The Author
