Kanbalu Ah SAC Ralkap Pawl Nih Hmunhma An Khuarnak Khua 5 An Kah Hna, 10 An Thi
The Chinland Post | 2023 August 29 — Sagaing ramṭhen, Kanbalu peng ah a um mi SAC ralkap le pyusawthi pawl nih hmunhma an khuarnak khuate 5 cu an kah hna i SAC lei 10 an thi tiah Kanbalu Underground Warriors phu sin in thawng theih a si.
August 26 chun sml 12:00pm luan hrawng ah Kanbalu peng chung ah a um mi SAC ralkap pawl hmunhma an khuarnak Natpe, Yaw, Layhla, Ngato khua le Watto khua hna cu dothlennak phu pawl nih an va kah hna hi a si.
Kahdohnak chung ah Kanbalu Underground Warriors, MPF U-18 le Local PDF hna bawm in Natpe pyusawthi khua cu 81MM lung 10, Yaw pyusawthi khua cu 81MM lung 4, Layhla khua cu 60MM lung 4 le Ngato pyusawthi khua cu 60MM lung 2 in an kah hna tiah theih a si.
Cun August 28 zaanṭim sml 12:45am hrawng ah Watto khua SAC ralkap pawl nih hmunhma khuarnak cu dothlennak phu pawl nih an va kah hna i SAC ralkap le pyusawthi 10 hrawng an thi, aa hliam mi zong an tam tiah theih a si.
Cun Sagaing ramṭhen, Ye U peng ah SAC ralkap pawl nih an kah mi hriamngan ruang ah mipi himnak a latu phu (ပလဖ) hruaitu pakhat a nunnak a liam tiah Ye U hrambunh People’s Defense Force Comrade nih Khit Thit ah an chim.
August 28 zinglei, Thabayin peng in Ye U lei ah a lut mi SAC ralkap nih khuate le ramlak lei ah hriamngan an kah i khuami hna himnak a lakpiaktu phu hruaitu Ko Nay Myo Aung a nunnak a liam tiah theih a si.
About The Author
