Kani, Myaung, Nattalin hna ah kahdohnak a chuak i SAC ralkap 21 an thi

The Chinland Post | 2022 October 10 – Sagaing ramṭhen, Kani peng, Myaung peng le Bago ramṭhen Nattalin hna ah kahdohnak a chuak i SAC ralkap 21 an thi tiah PDF nih an thanh.

Bago ramṭhen, Nattalin peng kayinsin khua ah SAC ralkap bom puah hnawh an tong i SAC ralkap 4 an thi tiah theih a si.

Kayinsin khua ah a raami SAC ralkap 23 hrawng cu October 8 zinglei sml 10:30am hrawng ah Thayarwaddy pengkomh battalion MRF-Nattalin nih bom an puah hnawh hna hi a si tiah theih a si.

Bom puahnak ah SAC ralkap 4 an thi i 7 nak tlawm lo fak piin an i hliam tiah MRF-Nattalin phu nih an thanh.

Myaung ah Kyaukyit pawng a ummi SAC ralkap gate cu bom an puah hnawh hna i SAC ralkap 2 an thi tiah theih a si.

October 9 zinglei sml 10:30pm hrawng ah Kyaukyit pawng ah a ummi SAC ralkap gate cu PDF nih bom an puah hnawh hna i SAC ralkap 4 chung ah 2 cu an phorh hna caah an thi ko lai tiah an fehter.

Cu bom puahnak cu CDSOM, Joker GZ, M2W hna nih an tuah tiah theih a si.

Cu bantuk in Sagaing ramṭhen, Kani peng, Moypaitaung pawng October 7 zinglei sml 7:00am hrawng ah SAC ralkap pawl cu DRPA phufonh nih an kah hna i sml 4 leng kahdohnak chung ah SAC ralkap 15 nak tlawm lo an thi i PDF hriamtlai 2 an i hliam tiah DRPA nih a thanh.

Na ruahning rak langhter ve.. (Leave a comment)

%d bloggers like this: