Kanpetlet Peng NLD Nih Thimnak I Cuh Loin Duhlonak Langhter An Timh
Salai Aung Aung| 2018 May 31| Tukum November 3 ah tuah dingmi caankarlak thimnak ahhin Kanpetlet peng NLD pawl cu thimnak ah i cuh loin Chin ramkulh NLD party cungah an duhlonak tu langhter ding in peng huap committee le party chungtel pawl hnatlaknak an ngei tiah theih a si.
“Abiapi cun ramkulh party cungah kan lungtlinlonak langhter a si ko. Chin ramkulh NLD Chairman, Secretary le ramkulh cozah i an thiltuah ning hi NLD nih aa tinhmi he zeitin hmanh in aa mil lo caah le kan zumh hna lo caah Kanpetlet peng Pyithu hluttaw palai hmuhma a lawngmi ah thimfung i cuh lo ding in biachahnak kan tuah. Hiti kan tuahnak a ruang bik cu ramkulh party chairman Pu Zo Bawi thil tuah ning hi kannih cu zeitinhmanh in kan lung a tlin lo caah kan duhlonak langhternak caah thimnak i luh kan i timh lonak a si” tiah Kanpetlet peng NLD Party chairman U Thang Ma Na Lai nih a chim.
2015 ramkulh cozah phu an rak ser lio ah khan cozah phu an ser ning an lung a tlin lo caah Kanpetlet peng NLD Party EC minung 15 nih party in chuah ding ca an rak tial nain party chairman Pu Zo Bawi le Secretary Pu Aung Taan nih an rak nawl hna caah party chuah an i timhmi cu an tlam a rak tling lo tiah theih a si.
Cun U Thang Ma Na Lai nih cun, “Kanpetlet ah Thura Aung Ko kha kan tei. Chin ramkulh peng 9 chung in cozah phu an ser tikah peng pakhat in minung pa hnih thum cio an i tel. Cu chungah Kanpelet in minung pakhat hmanh kan i tel lo. Tedim ah NLD nih teinak an hmu lo nain Pu Mang Hen Dal cu minister rian an pek. Pali ning tein Kanpetlet in teinak kan hmuh i pakhat hmanh minister rian an kan pe lo. Kan minung ah minister a tuan kho ding an um ve ko. Cucaah Chinram chaklei thlanglei tiin thleidannak a um tiah kan hmuh. Pu Zo Bawi nih tlerhkhonhnak bia a rak chim bal. NLD central party nih chuahmi Calendar man 200,000 kan chuah khawh lo ruangah cozah phu ah tinco awk a um tikah Kanletpet peng cu pek nan si te lai lo tiah ka sinah a chim bal” tiah a chim chap.
Caankarlak thimnak ah lut loin ramkulh huap party sinah duhlonak langhter ding in Kanpetlet peng NLD party EC chungtel dihlak nih tuzarh cawn ninga, peng huap party meeting ah biachahnak an tuah lai tiah theih a si.
Ref: ZA LEN
About The Author
