Karenni peng January thla chung ah kahdohnak voi 36 a chuak, SAC ralkap 22 an thi i KNDF hriamtlai 5 an nunnak a liam
The Chinland Post | 2023 February 3 — Karenni ram January thla chung ah kahdohnak voi 36 a chuak i SAC ralkap 22 an thi, KNDF hriamtlai 5 an nunnak a liam tiah KNDF sin in thawng theih a si.
January zarh 2 nak thawk in SAC ralkap pawl cu phu 3 ṭhen in Demoso peng, Sanpiah khua ah an luh caah ni 6 chung kahdohnak a fak, cu hnu ah Nanhutwe khua lei ah an kal ṭhan i cuka khua pawng ah kahdohnak a fak ṭhan i February 3 tiang kahdohnak a fak rih tiah theih a si.
January 20 ah Bawlakhe peng, Nanpe khua pawng ah SAC ralkap pawl an rak luh caah kahdohnak sml 2 tluk a chuak i SAC ralkap 5 an thi, hriamngan/hme zong tampi an lak khawh tiah theih a si.
KA, KNDF le adang phufonh nih Karenni ram chung ah kahdohnak a phunphun leng ah sakhaan lak kahdohnak zong tlamtling tein an tuah khawh tiah a thanh.
SAC ralkap nih vanlei kahdohnak, hriamngan kah ruang ah mipi inn 5, phungki sianginn 2, pura hna a rawk i minung 1 hriamngan ruang ah a nunnak a liam, 5 an i hliam tiah a thanh.
About The Author
