Kawkareik ah a ummi BGF sakhaan cu Karen hriamtlai phufonh nih an lak
The Chinland Post | 2022 October 24 – Karen ram, Kawkareik peng ah a ummi SAC kuttang BGF sakhaan cu October 21 zaan ah Karen hriamtlai phufonh nih an lak khawh tiah Lion Battalion Commando nih a thanh.
Cu BGF sakhaan cu zaan sml 7:00pm hrawngah an lak khawh i Lion Battalion Commando, White Tiger phu, Eagle Brigade, Justice Soldier le adang hriamtlai phufonh pawl nih an doh hna hi a si tiah an langhter.
KNU Brigade 6 hmunhma, Kawkareik khuachung ah a ummi GAD zung zong October 21 ah Karen hriamtlai phufonh nih an kah hna i sml 8 chung kahdohnak a rauh hnu ah SAC ralkap 8 an thi.
Kahdohnak chung in MA zuun 4, M16 zuun 1, 40MM kuan 50 le adang kuan 300 kan lak khawh tiah Lion Battalion Commando nih a thanh.
Kahdohnak a fah ruangah SAC ralkap nih kahdohnak vanlawng, Helicopter hna hmang in vanlei kahdohnak voi 54 a tuah lengah hriamngan zong a kah len tiah an thanh.
SAC ralkap lei hriamngan le vanlei kahdohnak ruangah mipi inn cheukhat cungah hriamngan a tla i a puah caah khuami cheukhat an thi, aa hliam mi zong an um tiah theih a si.
Cu kahdohnak he pehtlai in SAC nih a thanh ning ah mipi 3 an thi i 16 an i hliam tiah a langhter.
About The Author
