Kawkareik peng ni 12 chung kahdohnak ah SAC ralkap lei in 48 an thi i hriam cheukhat zong an lak khawh
The Chinland Post | 2023 January 9 – Karen ram, Kawkareik peng, KNU Brigade 6 hmunhma i ni 12 chung kahdohnak ah SAC ralkap 48 an thi i hriam zong an lak khawh tiah Cobra Column nih a thanh.
December 19 in December 31 tiang Kawkareik peng, Asia lamcung kahdohnak ah SAC ralkap lei in Major 2 telh in 48 an thi, 61 an i hliam i hriam cheukhat zong an lak khawh tiah theih a si.
Mipi hriamtlai phufonh lei in KNLA B18, B27, Cobra Column, Dawna phu, White Tiger phu, White Dragon phu, Federal Wings Drone phu, Golden Eagles Drone phu le SAC ralkap karlak ah caan saupi kahdohnak a chuak i Cobra Column phu lei in 10 an i hliam i 1 a nunnak a liam, Dawna phu in 4 le White Dragon phu in 3 an i hliam hna tiah theih a si.
Kahdohnak chung ah SAC ralkap sin in MA3 zuun 2, MA2 zuun 1, Kuanbawm 12, 40MM kuan 29, bomrap 2, Grenade 6, RPG kuan 2, zen lung 3, 60MM kuan 1, rifle bom 1, 7.62 kuan 650, 5.56 kuan 565, kuan khamnak lukhuh 6 hna cu Cobra Column nih an lak khawh tiah theih a si.
KNLA B18 zong nih MA3 zuun 1 an lak khawh i SAC tank 2 an hrawh khawh tiah thawng theih a si.
About The Author
