Kawlram nih ramdang in ramchung luhnak nawl April 30 tiang a phih

Kawlram cozah nih ramdang in Kawlram luhnak – vanlawng in luhnak cu April 30 tiang a phih chap tiah theih a si. Kawlram cozah nih April 13 tiang a phih nain April 11 ah Kawlram ruahnak petu Daw Aung San Suu Kyi nih April 30 tiang ka phih lai tiah a Facebook ah thawng a thanh.

Vawleicung ram 200 tluk ah a karhmi Covid-19 zawtnak ruang ah atu bantuk in ramchung ramleng luhchuahnak cozah nih a phih hi a si.

Cun cozah nih zohkhenhmi (Facility Quarantine) siseh, innchung ah erh ding in khiahpiak mi (home quarantine) zong ni 14 in, ni 21 ah an chap. “Ni 14 chung kan erh hna nain ni 14 a tlin hnu ah Covid-19 zawtnak kan hmuh than hna caah ni 21 tiang erh ding kan timhnak hi a si,” tiah Aung San Suu Kyi nih a Facebook ah a tial.

Ni 14 erh in zohkhenh hnu ah Covid-19 zawtnak an hmuhmi cu US in a rak tlungmi Tedim siizung chiahmi sin in a si.

Nihin tiang Kawlram ah Covid-19 in a zawmi minung 31 an hmuh cang hna. Minung pathum an nunnak a liam tiah theih a si.