June 21, 2024

Khonumthung Burmese Le CNA Chimphuannak Nawl A Ngeitu Salai Htet Ni Biaruahnak

0

“SAC ralkap sakhaan pawl khua kip ah a um caah cu pawl a thian khawh nakhnga a biapi tuk, mipi bawmhnak, tlangcung hriamtlai pawl funtomnak he lungrual tein kahdohnak tuah ding timhtuahnak kan ngei”

The Chinland Post | 2024 May 23 — Chinland cozah, Defense Ministry nih Chin ramkulh chaklei, Tozang peng ah May thla zarhhnihnak thawk in khuapi lak kahdohnak cu a voikhatnak bik a tuah khawh i Operation ni 5 a rau, May 19 le May 21 ah Tonzang le Cikha khua hna cu tlamtling tein an lak khawh.

May 15 ah an thawk mi khuapi lak kahdohnak dirhmun he pehtlai in CNF/CNA chimphuannak nawl a ngeitu Salai Htet Ni kha Khonumthung Burmese nih biaruahnak a tuah mi a si.

Khonumthung Burmese: Chinland cozah, Chinland Ministry nih atu bantuk in a voikhatnak Tonzang khua Operation a tuah mi hi Chin dothlennak caah zeitluk in dah a biapit?

Salai Htet Ni: Kan dothlennak hi ramkhel, kahdohnak he tiah aa ruang tein kan kalpi. Kahdohnak hi cu ramkhel buainak ruang ah atu dirhmun tiang a phak hi a si. Cucaah ramkhel dirhmun ning in kahdohnak hi kan tuah mi a si. Atu cu Chinland cozah a dir cang caah SAC doh ding hi thazang ṭhawng taktak in kal kan duh, cucaah Chinland Council, Chinland cozah Defense Ministry kuttang ah CNA le mah le hmunhma cio hriamtlai phu pawl fonh in Chinland Defense tang ah thazang ṭhawng ngai in kahdohnak kan tuah hi a si. Mah hi a biapi tuk mi kahdohnak le ramkhel lei funtomnak pakhat dirhmun in kahdohnak kan tuah hi a si.

Khonumthung Burmese: Tonzang khua kahdohnak hi ni 5 chung a rau tiah kan theih. Kahdohnak hi zeitindah a chuah? Zeitluk tiang dah a fah? Kahdohnak kong na kan fianh kho hnga maw?

Salai Htet Ni: Tonzang ah a um mi 269 sakhaan pawl, palek sakhaan pawl, SAC ralkap nih hmunhma an khuarnak pawl, cun Cikha khua ah a um mi SAC ralkap sakhaan pawl la ding in thazang ṭhawng taktak in dothlennak phu le Chinland Defense Ministry tang ah a um mi hriamtlai phu zapi nih May 15 in nihin ni tiang kahdohnak kan tuah hi a si. Cubantuk in kahdohnak kan tuah tik ah SAC ralkap pawl kha Tonzang, Cikha ah hmakhat te kah ding in Operation kan thawk. Cubantuk in operation kan thawk hlan ah India ramri ah a um mi Cikha khua um SAC ralkap pawl cu Tonzang ah a fonh hna. Cheukhat an tang rih tiah kan theih. Cun Tonzang khua ah atu bantuk in kahdohnak kan thawk tik ah an ralkap aa hliam mi pawl kha mawṭaw in Cikha khua ah an kuat hna tiah thawngpang kan theih caah Cikha khua ah SAC ralkap pawl an um kho rih tiah Cikha khua kan panh tik ah an rak um ti lo, cu lam 2 cu kan kham hmasa hnu ah Tonzang khua kan kulh i Tonzang khuachung sakhaan pawl kan lak. Asinain Jet vanlawng, Mi 35 nih bom pehzulh in a rak thlak. A phir mi bom le bom 20, 16, 8 phir hna in a rak thlak. Asinain SAC ralkap nih hmunhma an khuarnak sakhaan vialte kan lak khawh dih.

Sakhaan kan lak dih hnu ah bawmhnak cu Husky in thazang 50 hrawng a rak thlak. Kan kah ṭhan hna i bawmhnak a ra mi hna chung in ralkap 11 hrawng cu a hmun ah thi lak in kan kah khawh hna. Atu cu an um tawnnak sakhaan in khuachung hmunhma pakhat khat ah an i ṭhial. Tuzing khua a dei ka te ah kan luh hnawh hna i atu cu kahdohnak vanlawng nih Tonzang khualeng tiang atu le atu a kah. SAC ralkap pawl hi khualeng an rak phan i kahdohnak kan peh rih. SAC ralkap sin in hriam zuun 50 kan lak khawh. Ruak 11 kan hmuh. Cikha khua cu SAC ralkap an thian cang caah hnangam a si cang nain Tonzang khuachung ah SAC ralkap an um ti lo nain khualeng ah an um rih caah hnangam dirhmun a phan deuh rih lo tiah chim ka duh. Kahdohnak vanlawng hi cu atu le atu a ra peng rih.

Khonumthung Burmese: SAC ralkap ruak hi 11 a si caah kahdohnak chung ah anmah lei a thi mi hi zeizah dah an si?

Salai Htet Ni: May 15 in nihin tiang hin 20 hrawng an si. Aa hliam mi hi cu an tam lai, zeiruang kan ti a si ahcun kan kah hmasa hna lio ah Cikha lei ah mawṭaw 2 in an phorh hna, sizung a phan mi zong an um, ZRA ralkap 10 le SAC ralkap 8 tiah mawṭaw in an phorh hna.

Khonumthung Burmese: Tozang ah ZRA (EC) zong nih hmunhma an khuar, atu kahdohnak zong ah SAC lei in kahdoh an bawmh hna caah zeiruang ah SAC lei an bawmh hna? Zeibantuk in dah kahdoh an bawmh hna?

Salai Htet Ni: Tonzang khuachung ah siseh, Cikha khuachung ah siseh SAC ralkap pawl he fonh in hmunhma an khuarnak hi a caan sau cang. Tonzang khua Operation kan kal lio ah Tonzang phak hlan lam thluangthluan an kan kham i an kan kah. Bomrap an kan puah hnawh. Cucaah Tonzang khua cu May 15 lawng ah kan ṭum kho. Lam thluangthluan kahdohnak zong ah an sakhaan hme 3 kan lak khawh.

Khonumthung Burmese: Cuti a si ahcun ZRA (EC) an dirhmun hi zeidah a lawh?

Salai Htet Ni: An zapi in Tonzang khuachung in an kir dih cang, Tonzang khuachung ah an um ti lo. Manipur lei a um mi ZRA pawl bawmhnak hal in an thazang an chap tiah kan theih. ZRA he kan i kahnak ah anmah lei minung 6/7 hrawng hi cu Manipur lei an kalpi hna i an ruak an vui hna tiah kan theih, atu zong an minung an tling lo i kanmah sin ah an minung an um maw ti a hal mi zong an um.

Khonumthung Burmese: Tonzang khua lak Operation chung ah Chin dothlennak phu zeizah dah an i tel? Zei phu pawl dah an si hna?

Salai Htet Ni: A biapi in Chinland Defense Ministry tang um mi phu 13, CNA he cun phu 14 leng ah rawn lei kan unau pawl zong an i tel. Kanmah he aa bawm mi Y-PDF zong an i tel. Kan zapi phu 14 cu kan si lai.

Khonumthung Burmese: Tonzang khua lak kahdohnak ah Chin dothlennak phu lei a nunnak liam mi, aa hliam mi zeizah hrawng dah an um?

Salai Htet Ni: Tonzang le Cikha khua lak kahdohnak ah kanmah lei 2 an nunnak a liam, aa hliam mi 10 an um, an dam thluahmah cang.

Khonumthung Burmese: Tonzang khua nan lak cang caah Chin ramkulh ah a um mi khua lak kahdohnak pawl tuah ding kong he pehtlai in zeitel chim na duh maw?

Salai Htet Ni: SAC ralkap sakhaan pawl khua kip ah a um rih caah an thian khawh nakhnga a biapi tuk. Cucaah pehzulh in kahdohnak kan tuah rih lai. Thazang ṭhawng tak in kahdohnak kan tuah khawh nakhnga mipi bawmhnak, adang tlangcung hriamtlai pawl funtomnak, lungrual tein kahdohnak tuah rih kan i tim.

Khonumthung Burmese: Tonzang khua nan lak cang caah mipi uknak zeitin nan tawlrel lai?

Salai Htet Ni: Hihi cu Chinland cozah le Chinland Council rian a si cang lai, asinain mipi uknak cu a um cang mi a si, bianabia ah- CNA le cuka hmunhma hriamtlai pawl nih himnak caah sakhaan pawl kan fim lai, mipi uknak hi cu Chinland cozah nih a tawlrel lai, an tawlrel tik ah a rak um cang mi mipi uknak pawl kha cu anmah tein an tlaih ko lai.

Khonumthung Burmese: Adang chim na duh mi a um ti maw?

Salai Htet Ni: Tonzang le Cikha khua lak kahdohnak hi Chinland Council, Chinland cozah kan dirh hnu ah cozah dirhmun in a voikhatnak a thawk mi kahdohnak a si. Hmaifon ding hi cu kahdohnak, ramkhel thazang ṭhawng taktak in kan tuah rih lai. Mipi dothlennak kan tuah mi a si caah mipi lei nih a lamkip in bawmhnak cu kan herh ko. SAC le hramhram uknak a hram in kan bongh lai i kan ram hi Federal Democracy ram kan ser khawh nakhnga tuah ding a tamtuk rih. Atu nak ṭhawng chin in pehtlaihnak le thazang ṭhawng taktak kal chin ding in mipi siseh, kan zapi zangfah kan in nawl hna i SAC he aa bawm mi minung siseh, phu si hna seh a caan um lio te ah kanmah he i bawm ding in kan in zangfah hna lio caan te ah kan in nawl hna.

About The Author

Na ruahning rak langhter ve.. (Leave a comment)