Khun Lung Peng Kamaing Hrambumh Battalion 143 Ralkap Minung An Dihlak Hriamnam He SAC An Chuahtak
The Chinlandpost | November 1, 2023 — Chaklei Shan ramkulh, Khun Lung peng, Ka Maing hrambunh SAC ralkap battalion 143 minung dihlak hriamnam he SAC an chuahtak tiah MNDAA nih thawngthanhnak a tuah.
October 30 ni, Khun Lung peng thlanglei um, Ka Maing hrambunh battalion 143 ralkap minung 41 nih unau hawikom phu 3 sin ah hriamnam he an rak luh, ralkap 41 ah Second-in- Command 1 telh in rawlbawi တပ်ခွဲမှူး (Company Commander 2) zong an i tel tiah theih a si.
Khun Lung peng, Ka Maing hrambunh SAC ralkap rual hi battalion sakhaan chung erh in bawmchantu an hngak, October 29 zaan ah unau hawikom phu 3 hna nih an sin lut ding in an chawnh hna, October 29 ni ah MNDAA lei nih “ Kan nih ralkap phu MNTJP party hruaining bantuk in ramkhel rian a tuan mi le dohthlennak a tuah mi bu kan si, midang thah le nawn cu kan i timh mi a si lo, kan bu nih cun, kan sin aa rak dor mi, kan tlaih mi hna cu dawtnak he zohkhenh ding” tiah kan ralkap bu timh mi a si caah kaphnih biachawnhnak ngeih a si hnu October 30 ah battalion 143 ralkap 41 hna nih an hriamnam cu battalion sakhaan ah kaltak in hnu an kir tak hi a si.
MNDAA sin a rak lut mi SAC ralkap 41 cu minung pakhat ah umkalnak tangka kyat sing 15 cio in sing 700 leng an pek hna. Nihin SAC hi battalion pakhat ah ralkap minung 100 hrawng lawng a um. Mah lak ah battalion a chuahtak mi, nifa tein a tli mi le a thi mi an um peng tiah theih a si.
“ Ka Maing hrambunh bantuk in battalion dihlak hriamnam he a tli mi an um rih lo, mah hi zohtik ah SAC pawl an chunglei uknak aa rawk dih cikcek a langhnak a si” tiah MNDAA ralkap bawi pakhat nih Khit tit media sin ah a chim.
Battalion 143 lei hriamnam an kal tak mi ah, Operator seh 3, Rifle meithal zuun 27, Seh meithal a hme zuun 5, RPG zuun 2, Sniper 2, Seh meithal a lian zuun 2, Type-82 zuun 1, 60 MM 2, 5.56 kuan bawm 11, 5.56 shot gun kuan 8000, Enaga bawm 3, Rifle kuan bawm 130, MA-4 bomb thei 80, Bom thei phungtling 247, 82 MM bom thei 91, 100 MM bom thei 46, MA-4 meithal zuun 4, handphone 28, walkie talkie 7, facang tung 38, Readymade food bawmpi 12, Kalape pung 3, Sii bawmpi 5, Chiti pung 3, Datsi pung 3, Vok 1 hna an lak khawh mi a si tiah theih a si.
About The Author
