KNU hmunhma January thla chung ah kahdohnak voi 400 leng a chuak, SAC ralkap 460 leng an thi
The Chinland Post | 2023 February 15 — KNU hmunhma, January thla chung ah kahdohnak voi 430 leng a chuak i SAC ralkap a thi mi an tam tiah KNU nih a thanh.
KNU nih a tlaihnak hmunhma ah KNLA, KNDO hruainak in Drone phu, PDF phufonh le SAC ralkap karlak ah kahdohnak voi 436 a chuak tiah an thanh.
Kahdohnak chung ah SAC ralkap le BGF 469 an thi i 369 an i hliam tiah an langhter.
KNU hruai mi mipi hriamtlai phufonh lei in hriamtlai 24 nih ram le miphun caah an nunnak an pek i 76 an i hliam tiah theih a si.
SAC nih January thla chung ah vanlei kahdohnak voi 57 in bom lung 200 leng a thlak i Machine Gun pawl zong voi tampi a hman tiah an thanh.
SAC vanlei kahdohnak ruang ah hngakchia le Pastor telh in mipi 13 an nunnak a liam i 9 an i hliam. Biaknak lei inn, sianginn le phungki sianginn telh in mipi inn 33 a ciam i 24 a rawk tiah an langhter.
SAC ralkap nih sualnak ngei lo mipi umnak hmunhma lei ah hriamngan a kah ruang ah mipi 3 an nunnak a liam i siahngakchia 6 telh in mipi 38 an i hliam tiah theihternak a tuah.
SAC vanlei kahdohnak ruang le nuhrin covo buarnak ruang ah KNU hmunhma chung minung sing 4 leng an zaam cang tiah KNU cathanh chung ah hmuh khawh a si.
About The Author
